Ajit Pawar Final Rites: बुधवारची सकाळ महाराष्ट्रासाठी बारामतीमधून एक वाईट बातमी घेऊन आली. बारामतीमध्ये पोहोचत असतानाच काळाने झडप घातली आणि उपमुख्यमंत्री अजित पवारांचा विमान अपघातात मृत्यू झाला. धावपट्टीच्या बाजूलाच विमान कोसळले आणि प्रचंड मोठ्या स्फोटात अजित पवारांसह पाच जणांचा मृत्यु झाला. त्यांच्या निधनाची वार्ता येताच राज्यभरातून लोकांची रिघ बारामतीत येण्यास सुरुवात झाली असून, त्यांच्या पार्थिवावर २९ जानेवारी रोजी सकाळी ११ वाजता अंत्यसंस्कार करण्यात येणार आहेत.
अजित पवार यांच्या पार्थिवावर शासकीय इतमामात अंत्यसंस्कार करण्यात येणार आहेत. त्यांच्या निधनामुळे राज्यात तीन दिवसांचा दुखवटा घोषित करण्यात आला आहे.
विद्या प्रतिष्ठाण आणि काटेवाडीत अंत्यदर्शनासाठी ठेवणार पार्थिव
सकाळी ८ वाजून ४६ मिनिटांनी हा अपघात घडला. अजित पवारांचा मृतदेह अपघातस्थळावरून बारामतीतील पुण्यश्लोक अहिल्याबाई होळकर वैद्यकीय महाविद्यालय आणि रुग्णालयात नेण्यात आला. त्यामुळे रुग्णालयाबाहेर प्रचंड गर्दी झाली. त्यानंतर अजित पवारांचे पार्थिव अंत्यदर्शनासाठी दोन ठिकाणी ठेवण्याचा निर्णय घेण्यात आला आहे.
अजित पवारांचे पार्थिव विद्या प्रतिष्ठान विद्यानगरी चौक मैदानात अंत्यदर्शनासाठी ठेवण्यात आले. रात्री सव्वा सात वाजता पार्थिव रुग्णालयातून मैदानात नेण्यात आले. रात्री दहा वाजेपर्यंत हे पार्थिव इथे ठेवण्यात येणार आहे. त्यानंतर गुरुवारी (२९ जानेवारी) रोजी सकाळी ६ ते ९ वाजेच्या काळात अजित पवारांचे पार्थिव काटेवाडी इथे ठेवण्यात येणार आहे.
त्यानंतर त्यांचे पार्थिव परत विद्या प्रतिष्ठानमध्ये आणण्यात येणार असून, ११ वाजता त्यांच्यावर अंत्यसंस्कार करण्यात येणार आहेत. अजित पवार यांच्या अंत्यसंस्कारावेळी पंतप्रधान नरेंद्र मोदी, केंद्रीय गृहमंत्री अमित शाह यांच्यासह राजकीय, उद्योग, कला, क्रीडा, सांस्कृतिक क्षेत्रातील मान्यवर उपस्थित राहणार आहेत.
मुख्यमंत्री देवेंद्र फडणवीस, उपमुख्यमंत्री एकनाथ शिंदेंनी केलं सांत्वन
उपमुख्यमंत्री अजित पवार यांच्या निधन झाल्याचे वृत्त आल्यानंतर मुख्यमंत्री देवेंद्र फडणवीस, उपमुख्यमंत्री एकनाथ शिंदे यांनी शोक व्यक्त केला. दुपारी राज्यपाल आचार्य देवव्रत यांच्यासह मुख्यमंत्री फडणवीस, उपमुख्यमंत्री शिंदे हे बारामतीत पोहोचले आणि त्यांनी सुनेत्रा पवार, सुप्रिया सुळे यांची भेट घेऊन सांत्वन केले.
एक कर्तृत्ववान नेता हरपला -शरद पवार
अजित पवारांच्या निधनानंतर शरद पवारांनी आपल्या दुःख भावना व्यक्त केल्या. "हा महाराष्ट्राला प्रचंड मोठा धक्का आहे. एक कर्तृत्ववान नेता हरपला. हे नुकसान कधीही भरून निघणार नाही. पण, सगळ्याच गोष्टी आपल्या हातात नसतात. ही घटना निव्वळ अपघात आहे. यात कोणतेही राजकारण करू नये", अशी विनवणी शरद पवारांनी केली.
Web Summary : Deputy CM Ajit Pawar tragically died in a plane crash near Baramati. His body will be available for public viewing at Vidya Pratishthan and Katewadi before his state funeral at 11 AM. Three days of mourning declared.
Web Summary : उपमुख्यमंत्री अजित पवार का बारामती के पास एक विमान दुर्घटना में दुखद निधन हो गया। उनके पार्थिव शरीर को विद्या प्रतिष्ठान और काटेवाड़ी में अंतिम दर्शन के लिए रखा जाएगा। राजकीय सम्मान के साथ सुबह 11 बजे अंतिम संस्कार होगा। तीन दिन का शोक घोषित।