काही दिवसांपूर्वीच एकनाथ शिंदे यांनी मुख्यमंत्रिपदाची शपथ घेतली. तर देवेंद्र फडणवीस यांनी उपमुख्यमंत्रिपदाची शपथ घेतली. महाराष्ट्रात रंगलेल्या राजकीय नाट्यादरम्यान शिवसेनेच्या अनेक आमदारांनी बंडखोरी केली. त्यानंतर शिवसेनेच्या आमदारांना सूरत आणि नंतर गुवाहाटीला हॉटेलमध्ये नेण्यात आलं होतं. दरम्यान, राज्यात आता मुख्यमंत्री एकनाथ शिंदे यांच्या नेतृत्वाखाली सरकार स्थापन झालं आहे. सध्या एक भन्नाट व्हिडीओ समोर आला आहे. एका चिमुकलीनं मुख्यमंत्र्यांकडे प्रॉमिस मागितलं आणि उपस्थितांमध्ये एकच हशा पिकला.
अन्नदा डामरे असं त्या चिमुकलीचं नाव आहे. अन्नदा हिनं रविवारी मुख्यमंत्री एकनाथ शिंदे यांची त्यांच्या नंदनवन या बंगल्यावर भेट घेतली. यावेळी तिनं काही वेळ मुख्यमंत्र्यांशी संवादही साधला. अन्नदानं मुख्यमंत्र्यांकडे एक अजब प्रॉमिस मागितलं. येणाऱ्या दिवाळीच्या सुट्टीत मला तुम्ही गुवाहाटीला फिरायला घेऊन जायचं हं.. असं प्रॉमिस तिनं एकनाथ शिंदे यांच्याकडे मागितलं. यानंतर उपस्थितांमध्ये एकच हशा पिकला.