"शेवटच्या एका मिनिटात काय घडलं पत्ताच नाही, विमानाचा 'ट्रान्सपॉन्डर'च...!" रोहित पवारांच्या मानात संशयाची पाल चुकचुकली

काय म्हणाले रोहित पवार? ट्रान्सपॉन्डरचं नेमकं काम काय?

दिवंगत उपमुख्यमंत्री अजित पवार यांच्या विमान अपघातासंदर्भात आज राष्ट्रवादी काँग्रेस (शरद पवार)चे पक्षाचे आमदार रोहित पवार यांनी मुंबईत पत्रकार परिषद घेत, पीपीटीच्या माध्यमाने अनेक प्रश्न उपस्थित केले आहेत. यावेळी त्यांनी विमानातील ट्रान्सपॉन्डरसंदर्भात भाष्य केले. "कदाचित ट्रान्सपॉन्डर हा मुद्दामून विमानाच्या आतून बंद केला होता," असा गंभीर आरोप अथवा दावा त्यांनी यावेळी केला. यासंदर्भात बोलताना, "८.४३.१८ वाजता ट्रान्सपॉन्डर हा बंद झाला. का बंद झाला? का कुणी बंद केला?" असे प्रश्न आमदार रोहित पवार यांनी यावेळी उपस्थित केले.

काय म्हणाले रोहित पवार? ट्रान्सपॉन्डरचं नेमकं काम काय? -विमानातील ट्रान्सपॉन्डरसंदर्बात बोलताना रोहित पवार म्हणाले,"विमानाला एक ट्रान्सपॉन्डर (Transponder) असते. विमान सांगत असते सॅटेलाइटच्या माध्यमातून की मी येथे आहे. माझा स्पीड किती आहे? एअरपोर्टचे जे स्टिप आहे, त्याला अलाइन झालोय का? तिथून माझे अंतर किती आहे? मी किती उंचावर आहे? माझे लोकेशन कुठे आहे? हे सर्व तिथं दिलं जातं आणि हे सर्व आमच्याकडे आहे. ही माहिती आम्हाला एका सॉफ्टवेअरच्या माध्यमातून मिळाली." 

"...तर आपल्याला शेवटपर्यंत कळाले असते" -रोहित पवार पुढे म्हणाले, "आम्हाला सर्व माहती समजली, केवळ शेवटच्या एक मिनिटाची माहिती आम्हाला कळली नाही. कदाचित ट्रान्सपॉन्डर हा मुद्दामून विमानाच्या आतून बंद केला होता. तुम्हाला विमान टिल्ट होताना दिसतेय. तेव्हा ट्रान्सपॉन्डर  बंद होता. ८.४३.१८ वाजता ट्रान्सपॉन्डर हा बंद झाला. का बंद झाला? का कुणी बंद केला? असे प्रश्न आम्हाला त्याच्यामध्ये आहेत. नाही तर आपल्याला शेवटपर्यंत कळाले असते." 

याशिवाय, "या एक मिनिटाच्या आधी हे विमान त्या धावपट्टीला अलाइन झाले होते. म्हणजे, ते धावपट्टीवर उतरेल, अशी अपेक्षा होती. पण एका मिनिटामध्ये काहीतरी गडबड झाली, ती अद्यापही आपल्याला समजलेली नाही," असेही रोहित पवार यावेळी म्हणाले.