Sanjay Raut: मुंबई बॉम्बस्फोटातील आरोपी सलीम कुत्ता याच्याशी संबंध असल्याचा आरोप झालेल्या सुधाकर बडगुजर यांना भाजपने पक्षात घेतलं आहे. ठाकरे गटातून हकालपट्टी झाल्यानंतर मंगळवारी सुधाकर बडगुजर यांनी भाजपमध्ये प्रवेश केला. स्थानिक भाजप नेत्यांचा विरोध डावलून हा पक्ष प्रवेश पार पडला. दुसरीकडे, ठाकरे गटाचे खासदार संजय राऊत यांनी बडगुजर यांच्यावरुन भाजपवर टीका केली आहे. भाजपने सगळ्या देशद्रोही लोकांना पक्षात घेतल्याचे संजय राऊत म्हणाले.
स्थानिक स्वराज्य संस्थांच्या निवडणुकीसाठी भाजपकडून तयारी सुरु असून महाविकास आघाडीतील नाराज नेत्यांचा भाजप पक्षप्रवेश करुन घेत असल्याचे माध्यमांनी विचारले. त्यावर बोलताना संजय राऊत यांनी भाजपवर जोरदार टीका केली. "भाजप आता सलीम कुत्ताल प्रचाराला आणणार आहे. हा पक्ष असे भंगार गोळा करुनच मोठा झालेला आहे. दहशत, पोलीस यंत्रणांचा वापर करुन आमच्यातले लोक फोडाचे. यांच्याकडे स्वतःचे काय आहे. यांच्या पक्षातील ९० टक्के आमदार हे दुसऱ्या पक्षातील आहेत. यांच्याकडे स्वतःचे काही नाही," असं संजय राऊत म्हणाले.
"भाजप आणि शिंदे गटाला त्यांना भ्रष्ट, गुंड, दाऊदचे हस्तक लागतात. भाजपने आता सलीम कुत्ता याला संत म्हणून पदवी दिली पाहिजे. कारण ज्या व्यक्तीला त्यांनी पक्षात घेतले ती व्यक्ती आमच्याकडे असताना त्याचे सलीम कुत्तासोबत जोडून आमच्या पक्षाला बदनाम करण्याचा प्रयत्न केला. आता तुम्ही देशद्रोही लोकांच्या खिशामध्ये जाऊन बसलेले आहात. भाजप अटलबिहारी वाजपेयी, लालकृष्ण अडवाणी यांच्या विचारांचा राहिलेला नाही. प्रफुल्ल पटेल यांचे दाऊदच्या हस्तकाबरोबर संबंध आहेत हे पंतप्रधान मोदी यांनी सांगितले. त्यानंतर सलीम कुत्ता हे प्रकरण भाजपने काढलं आहे. यासाठी मुख्यमंत्री देवेंद्र फडणवीस यांनी एसआयटी लावली होती. चंद्रशेखर बावनकुळे आणि रवींद्र चव्हाण यांच्यासोबत सलीम कुत्ता काल बिर्याणी खायला बसला होता का? देशद्रोही हा शब्द त्यांना लागू पडतो. कारण सगळे देशद्रोही त्यांनी त्यांच्या पक्षात घेतले आहेत. उद्या मुस्लिमांची मते हवी असतील म्हणून ते दाऊद इब्राहिमला पक्षात आणतील," असेही संजय राऊत म्हणाले.
दरम्यान, बडगुजर यांची सलीम कुत्ता याच्याबरोबर एका पार्टीत नाचल्याचा व्हायरल झाल्यावर नितेश राणे, दादा भुसे व अन्य नेत्यांनी जोरदार टीकास्त्र सोडले होते. त्यानंतर बडगुजर यांच्या पार्टीची विशेष चौकशी पथकाकडून तपासणी करण्याची घोषणा गृहमंत्री देवेंद्र फडणवीस यांनी विधानसभेत केली होती. मात्र वर्षभरानंतर बडगुजर यांचा भाजपमध्ये प्रवेश झाला आहे.