एसटी भाडेवाढीचा निर्णय आज?

एसटी महामंडळावर डिझेल दरवाढीचा मोठा आर्थिक बोजा पडत असल्याने महामंडळाकडून जवळपास २.५0 टक्के डिझेल दरवाढीचा प्रस्ताव तयार करण्यात आला आहे.

मुंबई : एसटी महामंडळावर डिझेल दरवाढीचा मोठा आर्थिक बोजा पडत असल्याने महामंडळाकडून जवळपास २.५0 टक्के डिझेल दरवाढीचा प्रस्ताव तयार करण्यात आला आहे. राज्य परिवहन प्राधिकरणाकडून मंजुरी मिळाल्याशिवाय ही भाडेवाढ होऊ शकत नाही. यासंदर्भात एसटी महामंडळ आणि राज्य परिवहन प्राधिकरणाची मंगळवारी बैठक होणार असून भाडेवाढीचा निर्णय होण्याची शक्यता असल्याचे सूत्रांकडून सांगण्यात आले. डिझेलच्या दरात नुकतीच १ रुपये ९ पैसे दरवाढ करण्यात आली. यामुळे मुंबईत ६५ रुपये २१ पैसे तर ठाण्यात डिझेल ६५ रुपये १५ पैसे झाले. राज्यातील इतर ठिकाणीही डिझेलची किंंमत एवढीच वाढली आहे. सध्या महामंडळाला दररोज ११ ते १३ लाख लिटर डिझेल लागत असून, त्यासाठी वर्षाकाठी २00 कोटी रुपयांपेक्षा जास्त पैसे मोजावे लागतात. आता वाढलेल्या डिझेलच्या किमतीमुळे त्यामध्ये आणखी ४ कोटी रुपयांची भर पडणार आहे. डिझेलच्या किमतीत वाढ झाल्यास सूत्रानुसार एसटी महामंडळ भाडेवाढ करू शकते. हे पाहता महामंडळाकडून जवळपास २.५0 टक्के भाडेवाढीचा प्रस्ताव तयार करण्यात आला आहे. भाडेवाढ झाल्यास महामंडळाच्या तिजोरीत आणखी १00 कोटी रुपयांची भर पडणार असल्याचे सांगितले जाते. या भाडेवाढीचा प्रस्ताव महामंडळ मंगळवारी प्राधिकरणाच्या बैठकीत ठेवणार असल्याचे सूत्रांनी सांगितले. त्यावर राज्य परिवहन प्राधिकरण विचारविनिमय करून भाडेवाढ तेवढ्याच पटीत योग्य आहे की नाही तसेच ती करणेदेखील किती गरजेचे आहे यावर विचार करेल आणि मगच निर्णय देईल, असे सांगण्यात आले. एका वरिष्ठ अधिकार्‍याने सांगितले की, भाडेवाढीचा प्रस्ताव आला तरी तेवढ्याच भाडेवाढीला मंजुरी मिळेल हे काही सांगता येणार नाही. (प्रतिनिधी)