राज्यमंत्र्यांच्या अधिकारांबाबत लवकरच बैठक : केसरकर

अर्थसंकल्पात सामान्य माणसांच्या सूचना घेणार

कोल्हापूर : राज्यमंत्र्यांच्या अधिकारांबाबत सरकार पातळीवर वाद नाही, याबाबत शिवसेनेचे पक्षप्रमुख उद्धव ठाकरे व मुख्यमंत्री देवेंद्र फडणवीस यांच्या उपस्थित समन्वय समितीची बैठक होईल, अशी माहिती राज्याचे ग्रामविकास व अर्थ राज्यमंत्री दीपक केसरकर यांनी पत्रकारांशी बोलताना दिली. केसरकर खासगी कार्यक्रमासाठी कोल्हापूर दौऱ्यावर आले होते, त्यावेळी त्यांनी पत्रकारांशी संवाद साधला. ते म्हणाले, काँग्रेस-राष्ट्रवादी आघाडीच्या काळात दोन वर्षांनंतर राज्यमंत्र्यांच्या अधिकाराबाबत निर्णय झाला होता. राज्यमंत्र्यांचा अधिकार ठरविण्यासाठी समन्वय समितीसोबत उद्धव ठाकरे व मुख्यमंत्री देवेंद्र फडणवीस यांची बैठक होणार आहे. राज्याचे उत्पन्न वाढवत अर्थव्यवस्था बळकट करण्यासाठी प्रयत्न सुरू केले आहेत. आगामी अर्थसंकल्प सादर करताना सामान्य माणसांकडून सूचना मागविण्यात आल्या आहेत, असे ते म्हणाले.