देहूगाव (जि. पुणे) : पंढरीचा महिमा। देतां आणिक उपमा।। ऐसा ठाव नाही कोठे। देव उभा उभी भेटे।। आहेती सकळ। तीर्थें काळे देती फळ। तुका म्हणे पेठ। भूमिवरी हे वैकुंठ।। असा पंढरीचा महिमा वर्णन करणाऱ्या श्री संत तुकाराम महाराजांचा पालखी सोहळा आषाढी वारीसाठी बुधवारी दुपारी अडीच वाजता देहूमधील देऊळवाड्यातून पंढरपूरकडे प्रस्थान ठेवणार आहे.
प्रस्थान सोहळ्यासाठी मुख्यमंत्री देवेंद्र फडणवीस, उपमुख्यमंत्री अजित पवार, केंद्रीय राज्यमंत्री मुरलीधर मोहोळ उपस्थित राहणार आहेत, अशी माहिती पालखी सोहळा प्रमुख दिलीप महाराज मोरे यांनी दिली. ते म्हणाले की, यंदाचा ३४० वा पालखी सोहळा आहे. श्री संत तुकाराम महाराज संस्थानच्यावतीने पूर्ण तयारी झाली आहे. चांदीच्या रथाला उजाळा देण्यात आला आहे. त्याला आठ कॅमेरे लावण्यात आले आहेत.
मंदिरात ४२ व मंदिराच्या बाहेरील भागात आठ कॅमेरे लावण्यात आले आहेत. मंदिराच्या कळसाला फुलांची सजावट करण्यात आली आहे. भजनी मंडपात सकाळी प्रस्थानापूर्वी देहूकर महाराजांचे काल्याचे कीर्तन होईल. दुपारी अडीचला महाराजांच्या पादुकांचे पूजन होऊन पालखीचे प्रस्थान ठेवले जाणार आहे. संत ज्ञानेश्वर महाराजांची पालखी कोणत्या ठिकाणी कधी पोहोचणार? येथे पाहा संपूर्ण वेळापत्रक.
यंदा संस्थानने तीन बैलजोड्या खरेदी केल्या आहेत. पालखीपुढे चालणारा मानाचा पेठ बाभुळगावकरांचा अश्व मंगळवारी चिखली येथे मुक्कामी असणार असून, बुधवारी प्रस्थानस्थळी उपस्थित होईल. अकलूजच्या मोहिते-पाटील यांचा अश्व बुधवारी सकाळी देहू येथे दाखल होईल.
कसा आहे संत तुकाराम महाराजांच्या पालखीचा मार्ग १८ जून- देहूतून प्रस्थान१९ जून- आकुर्डी२० जून- नाना पेठ, पुणे२१ जून- निवडुंगा विठ्ठल मंदिर, पुणे२२ जून- लोनी काळभोर२३ जून- यवत२४ जून- वरवंड२५ जून- उंडवडी गवळ्याची२६ जून- बारामती२७ जून- सणसर२८ जून- निमगाव केतकी,२९ जून- इंदापूर३० जून- सराटी१ जुलै- अकलूज२ जुलै बोरगाव श्रीपूर३ जुलै- पिराची करौली४ जुलै- वाखरी५ जुलै- पंढरपूर
पालखी सोहळ्यात रंगणार तीन उभे, तीन गोल रिंगण- बेलवडी येथे पहिले गोल रिंगण- काटेवाडी येथे मेंढ्यांचे रिंगण- इंदापूर येथे दुसरे गोल रिंगण - सराटी येथे पादुकांना नीरास्नान - अकलूज येथे तिसरे गोल रिंगण - माळीनगर येथे पहिले उभे रिंगण तोंडले बोंडले येथे धावा- बाजीराव विहीर येथे दुसरे उभे रिंगण - वाखरी येथे पादुका आरती आणि तिसरे उभे रिंगण- यंदा तिथीचा क्षय झाल्याने आंथुर्णे येथील पालखीचा मुक्काम रह- यंदा पालखी रथाच्या पुढे २७ व मागे ३७० दिंड्या सहभागी होणार