मुंबई - भाजपाच्या मांडीला मांडी लावून जे सरकारमध्ये बसलेत ते मिस्टर डॉ. बिन आणि त्यांच्या ४० लोकांनी हिंदुत्वासाठी शिवसेना सोडली हे तीर मारत असतात. त्यांच्याकडून चंद्रकांत पाटलांच्या विधानावर प्रतिक्रिया अपेक्षित आहे. बाळासाहेब ठाकरेंचा इतका मोठा अपमान करण्याची हिंमत कुणी दाखवली नव्हती. तुम्ही गुलाम झाल्यामुळे, शिवसेना फोडल्यामुळे चंद्रकांत पाटील आणि भाजपाचे इतर नेते शिवसेना, बाळासाहेब ठाकरे यांचा अपमान करतायेत असा आरोप करत ठाकरे गटाचे खासदार संजय राऊत मुख्यमंत्री एकनाथ शिंदे आणि फुटीर आमदारांवर गरजले.
बाबरी मशीद पाडण्याचा प्लॅन शिवसेना भवनात झाला नाही - चंद्रकांत पाटील
खा. संजय राऊत म्हणाले की, मुख्यमंत्री गुलाम आहेत. हिंमत असेल तर यावर प्रतिक्रिया द्यावी. पण गुलामाला हिंमत नसते. बाबरी पाडली त्यानंतर भाजपाने पलायन केले हा इतिहास आहे. बाबरी पाडणारे आमचे, भाजपाचे अन्य कुणी नव्हते ते शिवसैनिक होते असं विधान तेव्हाचे भाजपाचे राष्ट्रीय उपाध्यक्ष यांनी जाहीरपणे सांगितले होते. त्यानंतर लगेच शिवसेनाप्रमुख बाळासाहेब ठाकरे यांनी जर बाबरी पाडणारे शिवसैनिक असतील तर मला त्या शिवसैनिकांचा अभिमान आहे असं स्पष्ट विधान केले असं त्यांनी सांगितले.
तसेच आम्ही पळपुटे नव्हतो आणि नाही. ज्या पळपुट्यांना घेऊन आज भाजपाने सरकार बनवले. त्यांची हिंमत बाळासाहेब ठाकरे यांच्यावर चिखलफेक करू लागलेत. त्या चिखलात बसून डॉ. मिंदे आणि ४० आमदार सत्ता भोगतायेत. हे महाराष्ट्राचं आणि हिंदुत्वाचं दुर्दैव आहे. चंद्रकांत पाटील हे बोलले असले तरी त्यांच्या मुखातून भाजपा हे बोलली आहे. सत्तेचे मिंदे यावर तोंड उघडणार नाहीत हे माहिती आहे. हिंमत असेल तर राजीनामा द्यावा असं आव्हानही संजय राऊत यांनी दिले.
दरम्यान, आम्ही भाजपाच्या सत्तेत सामील झालेले गुलाम आणि मिंदे आहोत हे जाहीर करा अन्यथा राजीनामा द्या. शिवसेना आणि हिंदुत्वाचे नाव घेण्याचा तुम्हाला अधिकार नाही. अयोध्या आणि त्यानंतरच्या घडामोडीत हिंदुत्वाची मशाल धगधगती राहावी यासाठी बाळासाहेब ठाकरेंचे मोठे योगदान आहे. लखनौला बाळासाहेब ठाकरे विशेष न्यायालयासमोर हजर झाले होते हे भाजपाला माहिती नाही का? बेईमान, जे स्वत:ला हिंदुत्ववादी मानतात त्यांनी तोंडाचे कुलूप उघडावं मग आम्ही काय करायचे ते पाहू असा इशारा खासदार संजय राऊत यांनी भाजपाला दिला आहे.