“अशोक खरात विकृत, जलदगती न्यायालयात प्रकरण चालवून फाशी द्या”; सुनील तटकरेंनी केली मोठी मागणी

Sunil Tatkare On Ashok Kharat Case: भोंदूबाबा अशोक खरात प्रकरणाची सखोल चौकशी करावी, असेही सुनील तटकरे यांनी म्हटले आहे.

Sunil Tatkare On Ashok Kharat Case: भोंदूबाबा अशोक खरात विकृत आहे. हे प्रकरण जलदगती न्यायालयात चालवून अशोक खरात याला फाशीची शिक्षा द्यावी, अशी मोठी मागणी राष्ट्रवादी खासदार आणि नेते सुनील तटकरे यांनी केले आहे. सुनील तटकरे पत्रकारांशी बोलत होते. 

भोंदूबाबा खरात याच्या आर्थिक साम्राज्याचे धागेदोरे आता अधिक गडद होऊ लागले आहेत. सिन्नर तालुक्यातील जगदंबा पतसंस्थेत खरातने ठेवी ठेवण्यासाठी तब्बल ३२ खाती उघडल्याचे निष्पन्न झाले आहे. विशेष म्हणजे, ही सर्व खाती खरात स्वतःच ऑपरेट करत असल्याची कबुली पतसंस्थेच्या व्यवस्थापकाने दिली आहे. वाकचौरे व पोलिस निरीक्षक अपर पोलिस अधीक्षक सोमनाथ रंजीत गलांडे यांनी पतसंस्थेच्या व्यवस्थापकाचा सविस्तर जबाब नोंदवला. खरातने स्वतःच ३२ वेगवेगळ्या व्यक्तींच्या नावावर या संस्थेत सुमारे २ कोटी ७४ लाख रुपयांच्या ठेवी ठेवल्या होत्या. धक्कादायक बाब म्हणजे २०२४ मध्ये त्याने या सर्व रकमा काढूनही घेतल्या. ही सर्व खाती खरातच हाताळत होता.

अशोक खरात प्रकरण जलदगती न्यायालयात चालवावे, फाशी द्यावी

पत्रकारांशी बोलताना सुनील तटकरे म्हणाले की, अशोक खरात असो वा कोणी असो, अशी विकृत वृत्ती ठेचून काढली पाहिजे. अशोक खरात याचे प्रकरण जलदगती न्यायालयात चालवून जी काही फाशीची शिक्षा द्यायची आहे, ती दिली जावी. या विषयावर पूर्वीही बोललो होतो. सरकारने विशेष तपास पथक स्थापन केले आहे. त्यातून चौकशी होत आहे. सखोल तपास करावा. ज्यांचा कळत अथवा नकळत संबंध आला असेल, त्या सर्वांवर कठोर कारवाई करावी, अशी आमच्या सर्वांची मागणी आहे, असे तटकरे यांनी सांगितले.

दरम्यान, बारामतीची पोटनिवडणुक बिनविरोध व्हावी म्हणून तुळजाभवानीला साकडे घातले. अजित पवारांच्या अपघाताच्या प्राथमिक अहवालाबाबत आम्ही समाधानी नाही. जय पवार अगोदरच पत्रकार परिषद घेणार होते. त्यांनी बारामतीलाच खुलासा केला आहे. राष्ट्रवादीच्या राष्ट्रीय अध्यक्षा सुनेत्रा पवार यांच्या मार्गदर्शनाखाली आम्ही या प्रकरणाची एसआयटी चौकशी व्हावी अशी मागणी केली आहे, असेही त्यांनी म्हटले आहे.