Shiv Sena Shinde Group: आगामी महानगरपालिका, स्थानिक स्वराज्य संस्थांच्या निवडणुकांच्या पार्श्वभूमीवर राज्यातील राजकीय वातावरण चांगलेच तापत असल्याचे पाहायला मिळत आहे. ठाकरे गटाला लागलेली गळती थांबताना दिसत नाही. राज्यभरातील अनेक ठिकाणांहून महायुतीतील घटक पक्षात विरोधी पक्षांचे नेते सामील होत आहेत. महाविकास आघाडीतील घटक पक्षांना विधानसभेत पराभवाचा मोठा धक्का बसला. यानंतर माजी नगरसेवक, पदाधिकारी, नेते मोठ्या प्रमाणात भाजपा, शिवसेना शिंदे गट आणि राष्ट्रवादी अजित पवार गटात सामील होत आहेत. यातच पुणे, चंद्रपूर, नंदूरबार आणि धाराशिव येथील माजी नगरसेवकांनी शिवसेना शिंदे गटात प्रवेश घेतला.
उपमुख्यमंत्री एकनाथ शिंदे यांच्या उपस्थितीत हे सर्व पक्ष प्रवेश झाले. याबाबत एकनाथ शिंदे यांनी एक्सवर एक पोस्ट करून माहिती दिली. राज्यातील कानाकोपऱ्यातून लोक शिवसेना पक्षात मोठ्या संख्येने प्रवेश करत आहेत. दिलेला शब्द पाळणे आणि जनतेच्या कामांना प्राधान्य देण्याचे काम शिवसेना करत आहे. काम करणाऱ्या लोकांना शिवसेनेवर विश्वास वाटतो. त्यामुळे दररोज विविध पक्षांचे अनेक लोकप्रतिनिधी, पदाधिकारी आणि कार्यकर्ते शिवसेनेत प्रवेश करत आहेत. याच विश्वासाच्या बळावर आगामी स्थानिक स्वराज्य संस्थांच्या निवडणुकीसाठी सर्वांनी तयारीला लागावे असे आवाहन एकनाथ शिंदे यांनी यावेळी केले.
अनेक माजी नगरसेवकांनी शिवसेनेत प्रवेश केला
पुणे, चंद्रपूर, नंदुरबार आणि धाराशिव जिल्ह्यातील राष्ट्रीय काँग्रेस, राष्ट्रवादी काँग्रेस शरद पवार पक्ष व ठाकरे गटाच्या माजी नगरसेवकांनी मुंबईत पार पडलेल्या या विशेष सोहळ्यात शिवसेना पक्षात जाहीर प्रवेश केला. पुणे जिल्हा राष्ट्रीय काँग्रेस पक्षाचे प्रदेश सचिव सोनाली मारणे, नगरसेवक राहुल तुपेरे, शहर सरचिटणीस किरण मारणे, राष्ट्रवादी काँग्रेस (शरद पवार) गटाच्या मंगल पवार, गिरीष जैवळ यांनी शिवसेनेत प्रवेश केला. चंद्रपूर जिल्ह्यातल्या भद्रावती नगर परिषदेतील माजी उपाध्यक्ष प्रफुल्ल चटकी, माजी नगरसेवक सुधीर सातपुते, प्रमोद गेडाम, अनिता गेडाम, राजू सारंगधर, चंद्रकांत खारकर, शोभा पारखी, शीतल गेडाम, प्रतिभा सोनटक्के, आशा निबांळकर आणि प्रदीप वडाळकर या ११ माजी नगरसेवकांनी शिवसेनेत प्रवेश केला. धाराशिव जिल्ह्यातील सोमनाथ गुट्टे, आप्पासाहेब बिराजदार, शंकर चव्हाण, नागनाथ कदम, इलाई शेख, शहाजी हाके यांनी शिवसेनेत जाहीर प्रवेश केला. त्यांच्यासह राजस्थान आणि मध्य प्रदेश राज्यातील जबलपूर, विदिशा या जिल्ह्यांमधील ठाकरे गटाच्या पदाधिकाऱ्यांनीही शिवसेनेमध्ये प्रवेश केला.
दरम्यान, करणी सेनेचे महाराष्ट्र प्रदेश अध्यक्ष श्यामसिंह ठाकूर, उपाध्यक्ष धरमसिंह ठाकूर, राष्ट्रीय संघटक ठाकूर नेमसिंह सिसोदिया, मेवाड एकता फाऊंडेशनचे अध्यक्ष जीवन सिंघवी यांनीही त्यांच्या पदाधिकाऱ्यांसह शिवसेनेत प्रवेश केला. यावेळी श्यामसिंह ठाकूर यांची शिवसेना राजस्थान 'राज्य समन्वयक'पदी नियुक्ती करण्यात आल्याचे जाहीर करण्यात आले. मध्य प्रदेशातील जबलपूरचे ठाकरे गटाचे उपराज्यप्रमुख शैलेंद्र बारी, विदिशा जिल्हाप्रमुख विजेंद्र लोधी, जबलपूर जिल्हाप्रमुख सुजित पटेल, नगरप्रमुख मुकेश सारठे, इंदोरमधील जावेद खान, अभिषेक कालरा, सुरेश गुर्जर, राजीव चतुर्वेदी यांनीही शिवसेनेमध्ये पक्षप्रवेश केला.