Kasba Bypoll Election Result 2023: “मराठी माणूस पैशांत विकला जात नाही हे पुन्हा एकदा सिद्ध झालं”; सुप्रिया सुळेंची भाजपवर टीका

Kasba Bypoll Election Result 2023: रवींद्र धंगेकर मूळचे बारामतीमधील असल्याने हा विजय आनंद द्विगुणित करणारा आहे, असे सुप्रिया सुळेंनी म्हटले आहे.

Kasba Bypoll Election Result 2023: महाराष्ट्राचे लक्ष लागून असलेल्या कसबा विधानसभा पोटनिवडणुकीत महाविकास आघाडीच्या उमेदवाराचा विजय झाला. कसब्यामध्ये महाविकास आघाडीचे उमेदवार रवींद्र धंगेकर (Ravindra Dhangekar) यांनी भाजपा-शिवसेना महायुतीचे उमेदवार हेमंत रासने (Hemant Rasane) यांचा पराभव केला. तब्बल ३० वर्षांनी भाजपचा कसब्यात पराभव झाला. राष्ट्रवादी काँग्रेसच्या नेत्या आणि खासदार सुप्रिया सुळे यांनी यावर भाष्य करताना भाजपवर सडकून टीका केली आहे. 

महाविकास आघाडीचे उमेदवार रवींद्र धंगेकर मूळचे बारामती लोकसभा मतदारसंघातील आहेत. त्यांचा विजय हा आनंद द्विगुणित करणारी बाब आहे. महाविकास आघाडीच्या कार्यकर्त्यांनी आणि नेत्यांनी केलेल्या संघटित प्रयत्नांचा हा विजय आहे. मराठी माणूस पैशांत विकला जात नाही हे पुन्हा एकदा सिद्ध झाले. राजकीय पक्षापेक्षा हा विजय कार्यकर्त्यांचा आहे. त्यामुळे या विजयाचे खरे श्रेय कार्यकर्त्यांना जाते, असे सुप्रिया सुळे यांनी सांगितले. 

जनतेने ठरवले की कुणाच काही चालत नाही

राष्ट्रवादी काँग्रेसचे नेते आणि विधानसभेतील विरोधी पक्षनेते अजित पवार यांनीही कसबा निकालावर प्रतिक्रिया दिली. मनसेच्या कार्यकर्त्यांनी त्यांच्या वरिष्ठांना जाऊन सांगितले की, आम्ही रविंद्र धंगेकर यांना मदत करणार आहे तुम्हाला जी कारवाई करायची आहे ती करा, कुणीही आघाडी केली की जनतेने ठरवले की कुणाच काही चालत नाही, असे अजित पवार यांनी सांगितले.

दरम्यान, ठाकरे गटाचे नेते संजय राऊत यांनीही भाष्य करताना, ही परिवर्तनाची नांदी आहे. महाविकास आघाडीमध्ये शिवसेना आहे. कसब्यात आतापर्यंत शिवसेनेच्या पाठिंब्याने भाजप जिंकत आली आहे. महाराष्ट्राला, दिल्लीला आणि फडणवीसांना कळले असेल की खरी शिवसेना कुठे आहे. चिंचवडची जागाही आम्ही पहिल्या फेरीपासून जिंकू शकत होतो. तिथे अजून संघर्ष सुरू आहे. पण तिथे भाजप आणि मिंधे गटाने तिसरा उमेदवार उभा करून मतांची विभागणी केली. पुढच्या वेळी आम्ही चिंचवडही जिंकू, महाराष्ट्रही जिंकू, ही सुरुवात आहे. आता त्यांचा प्रत्येक बालेकिल्ला याच पद्धतीने उद्ध्वस्त करू, असा थेट इशारा संजय राऊतांनी दिला आहे. 

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम