तानाजी पोवार
कोल्हापूर : पश्चिम महाराष्ट्रासह नवी मुंबई, उस्मानाबाद येथील सुमारे २० गंभीर गुन्ह्यात पोलिसांना हवा असलेला ट्रिपल मोका कारवाईतील कुख्यात फरारी गुन्हेगार आप्पा उर्फ सुभाष ज्ञानदेव माने (वय ३२ रा. तामशेतवाडी, ता. माळशिरस, जि. सोलापूर) याला पोलिसांनी सापळा रचून जेरबंद केले. त्याचा फरारी साथीदार पप्पु उर्फ सुहास किसन सोनवलकर (३० रा. वडले, ता. फलटण, जि. सातारा) यांलाही अटक केली.
दोघा संशयितांच्याकडे कमरेला राऊंडसह लोड असलेले दोन पिस्टल, २० जिवंत राऊंड आदी शस्त्रसाठा जप्त केला. आरोपींच्यावर विवीध पोलिसांत दरोडा, रॉबरी, खंडणी आदी गंभीर गुन्हे दाखल आहेत.
बुधवारी सायंकाळी शिवाजी विद्यापीठ, शाहु टोल नाका परिसरात स्थानिक गुन्हे अन्वेषणचे पोलीस निरीक्षक तानाजी सावंत व त्यांच्या पथकाने तसेच राखील पोलीस दलाच्या मदतीने ही नियोजनबद्द कारवाई केली, अशी माहिती कोल्हापूर जिल्हा पोलीस अधीक्षक शैलेश बलकवडे यांनी पत्रकार परिषदेत दिली. स्थानिक गुन्हे अन्वेषण पथकास व राखीव पोलीस दलाच्या पोलीस अधीक्षक बलकवडे यांनी पथकाला ३५ हजार रुपयेचे बक्षीस जाहीर केले. संशयीतांनी बेळगाव (कर्नाटक)नजीक एका ज्वेलरी दुकानावर दरोड्याबाबत त्यांनी रेकी केल्याचेही पोलिसांनी सांगितले.