लोकमत न्यूज नेटवर्क
मीरारोड - मीरा भाईंदर महापालिकेच्या परिवहन सेवे कडून मीरारोड रेल्वे स्थानक ते अंधेरी रेल्वे स्थानक पूर्व अशी बससेवा सुरु करण्यात आली आहे .
मीरारोड परिसराची लोकसंख्या मोठी असून मुंबईला कामा निमित्त जाण्यासाठी बस सेवा सुरु करण्याची मागणी मार्च महिन्या पासून प्रभाग समिती सभापती हेतल परमार यांनी परिवहन सभापतीं कडे चालवली होती . त्या नंतर अन्य सदस्य आदींनी सुद्धा पत्र दिले होते . परिवहन समितीने बस सेवा सुरु करण्याचा निर्णय घेतल्या नंतर शुक्रवारी महापौर ज्योत्सना हसनाळे यांच्या हस्ते मीरारोड ते अंधेरी बससेवेचा शुभारंभ करण्यात आला .
आयुक्त दिलीप ढोले, परिवहन सभापती दिलीप जैन, नगरसेवक , अधिकारी , परिवहन सदस्य आदी उपस्थित होते . सदर बस मार्गावर १ वातानुकुलीत व १ विना वातानुकुलीत अश्या २ बस सुरू करण्यात आल्या आहेत . प्रवाश्यांनी बससेवेचा लाभ घ्यावा असे आवाहन नगरसेविका हेतल परमार यांनी केले आहे .