“वर्षभर दौरे करणार नाही, मला दररोज धमक्या येतात, माझे कुटुंब आता...”: मनोज जरांगे पाटील

Manoj Jarange Patil News: चंद्र-सूर्य असेपर्यंत मराठा आरक्षण राहणार आहे. त्याची काळजी नको, असे मनोज जरांगे पाटील यांनी म्हटले आहे.

Manoj Jarange Patil News: कायम टिकेल असे काहीतरी मागा. लाडकी बहिणीला दिलेले पंधराशे रुपये पुरतात का? बाजारात जाईपर्यंत उडून जातात. हीच किंमत आपल्या लेकरा बाळांची केली आहे का? मी जातपात पाहत नाही, तसे असते तर महादेव मुंडेच्या कुटुंबासाठी मी लढलो नसतो. माझ्यामुळे दाबलेली केस उघडी झाली आणि आता आरोपींना जेलमध्ये जाण्याची प्रक्रिया सुरू झाली, असे मनोज जरांगे पाटील यांनी म्हटले आहे. 

लाथ मारेन तिथून पाणी काढून दाखवेन. त्यामुळे शेतकऱ्यांना आता माझ्यासोबत हाक दिली की, एकत्र यावे. मग बघतो कशी कर्जमाफी मिळत नाही. कसे हमीभाव मिळत नाहीत. कशी पिक विमा रक्कम मिळत नाही आणि कसे दुधाला भाव मिळत नाहीत. फक्त तुम्ही एकत्र या, मी तुम्हाला मिळवून देईन. आपल्यावर सातत्याने काही दुकानदार माध्यमातून गबाळ उचलण्याची टीका करतात. मात्र या सर्व गाड्या समाजाच्या आहेत. मला जर यांनी गाडीतून खाली उतरवले तर माझ्याकडे रिक्षालाही पैसे नाहीत, असे मनोज जरांगे यांनी सांगितले. एका सभेत ते बोलत होते. 

आता मला कार्यक्रमाला बोलवणे बंद करा

वर्षभर आता आपण संपूर्ण दौरे थांबवणार आहोत. समाजासाठी एक नवीन यंत्रणा उभा करण्याचे काम हाती घेतले आहे. महाराष्ट्राच्या कोणत्याही कोपऱ्यात समाज बांधवाला अडचण आल्यास पंधरा मिनिटात त्या ठिकाणी मदत उभी राहील, अशी यंत्रणा उभारण्याचे काम सुरू आहे. वर्षभर हेच काम पूर्ण करणार आहे. त्यामुळे आता मला कार्यक्रमाला बोलवणे बंद करा. मला माझे काम करू द्या, असे आवाहन मनोज जरांगे पाटील यांनी केले.

दरम्यान, चंद्र-सूर्य असेपर्यंत मराठा आरक्षण राहणार आहे. त्याची काळजी नको. समाजासाठी लढतो म्हणून मला रोज धमक्या देण्यात येत आहेत. माझे कुटुंबही यात डावावर लागले आहे. कधी कोणी येऊन मला मारून टाकेल, याची कल्पनाही नाही. पण मी समाजासाठी उतरलो आहे. अशा धमक्यांना भीक घालत नाही आणि मी मरणाला भीत नाही, असे जरांग यांनी म्हटले आहे.