मुंबई : उद्योगपती मुकेश अंबानी यांच्या निवासस्थानाजवळ सापडलेली स्फाेटकांनी भरलेली कार तसेच मनसुख हिरेन मृत्यूप्रकरणी निलंबित पोलीस अधिकारी सचिन वाझे यांच्या कथित सहभागाच्या पार्श्वभूमीवर राज्य सरकारने पोलीस दलात बुधवारी मोठे फेरबदल केले. परमबीर सिंग (Parambir Singh) यांची मुंबई पोलीस आयुक्त पदावरून उचलबांगडी करत होमगार्डचे महासंचालक म्हणून बदली केली. तर राज्याचे प्रभारी पोलीस महासंचालक हेमंत नगराळे (Hemant Nagrale) यांची मुंबईचे पोलीस आयुक्त म्हणून नियुक्ती करण्यात आली आहे. बुधवारी सायंकाळी त्यांनी पदाची सूत्रे स्वीकारली. ( Major reshuffle in police force after Vaze case; Nagarale is new police commissioner of Mumbai)
लाचलुचपत प्रतिबंधक विभागाचे महासंचालक रजनीश सेठ यांच्याकडे पोलीस महासंचालक पदाचा अतिरिक्त कार्यभार सोपविण्यात आला आहे. राज्यातील सर्वात ज्येष्ठ आयपीएस संजय पांडे यांची होमगार्डमधून राज्य सुरक्षा महामंडळाच्या महासंचालकपदी बदली करण्यात आली. गृहमंत्री अनिल देशमुख यांनी ट्विटरवरून या नव्या बदलांची माहिती दिली. स्फोटक कारप्रकरणी राष्ट्रीय तपास यंत्रणेने वाझे यांना अटक केल्यापासून एनआयएकडून परमबीर सिंग यांची चौकशी केली जाण्याची शक्यता वर्तविण्यात येत आहे. त्यामुळेच राज्य सरकारने त्यांना आयुक्त पदावरून बाजूला करण्याचा निर्णय घेतला असल्याची चर्चा गृह विभागात आहे. पोलीस दलाच्या इतिहासात पहिल्यांदाच वरिष्ठ अधिकाऱ्यांच्या जबाबदारीमध्ये अनपेक्षितपणे इतक्या मोठ्या प्रमाणात फेरबदल करण्यात आले.
सचिन वाझे प्रकरणात आयुक्तपदावरून गच्छंती झालेले परमबीर सिंग यांनी गेल्या वर्षी २९ फेब्रुवारीला मुंबईच्या पोलीस दलाची सूत्रे हाती घेतली होती. त्यांनी कोरोना परिस्थिती, अभिनेता सुशांतसिंह राजपूत आत्महत्या, टीआरपी घोटाळा, अर्णब गोस्वामी प्रकरण हाताळले होते. त्यामुळे निवृत्तीपर्यंत म्हणजे ३० जून २०२२ पर्यंत तेच कार्यभार सांभाळतील अशी अपेक्षा होती. मात्र स्फोटक कार प्रकरणात मुंबई पोलीस दलाच्या प्रतिमेला तडा गेल्याने त्यांना पदावरून हटविण्याशिवाय सरकारपुढे दुसरा पर्याय नव्हता.
डीजीपी ते आयुक्त बनणारे नगराळे पहिले अधिकारी- महासंचालक पदावरून मुंबई पोलीस आयुक्तपदी निवड होण्याची ही पहिलीच घटना आहे. नगराळेंकडे डीजीपीचा तात्पुरता पदभार असला तरी यूपीएससी निवड समितीच्या शिक्कामोर्तबानंतर त्यांच्याकडे पद राहणार होते.
- त्यांच्याकडे अनपेक्षितपणे मुंबई आयुक्तपदाची जबाबदारी आली. ते पुढच्या वर्षी ऑक्टोबरमध्ये निवृत्त होतील. त्यामुळे त्यांना आयुक्त म्हणून १९ महिन्यांचा कार्यभार मिळेल. सरकारची इच्छा असल्यास त्यानंतरही मुदतवाढ मिळू शकते.
नगराळे यांची प्रशासनावर पकड- हेमंत नगराळे हे १९८७ च्या आयपीएस बॅचचे अधिकारी आहेत. चंद्रपूर जिल्ह्यातील भद्रावतीचे ते रहिवासी आहेत. - प्रशासनावर पकड असलेले अधिकारी म्हणून ओळखले जाणारे नगराळे यांच्याकडे गेल्या ७ जानेवारीला पोलीस महासंचालक पदाचा अतिरिक्त पदभार सोपविण्यात आला होता. - त्यापूर्वी त्यांनी २०१४ मध्ये मुंबईचे सहआयुक्त (प्रशासन) म्हणून तर जवळपास महिनाभर आयुक्तपदाची अतिरिक्त जबाबदारी सांभाळली. - २०१६ ते २०१८ या काळात ते नवी मुंबईचे आयुक्त होते. तेथून पदोन्नतीवर ऑक्टोबर २०१८ मध्ये त्यांची विधी व तंत्रज्ञ विभागात महासंचालक पदावर बदली झाली. डीजीपीचा कार्यभार सांभाळत असताना अवघ्या ७० दिवसांत त्यांच्यावर मुंबई पोलीस दलाची धुरा सोपविण्यात आली.
मुंबई पोलीस सध्या कठीण समस्येतून जात आहे. पोलिसांची मलीन झालेली प्रतिमा सर्वांच्या सहकार्याने सुधारण्याचा प्रयत्न करणार आहे. एका महत्त्वाच्या प्रकरणाचा एनआयए, एटीएस त्यांच्या पद्धतीने योग्य तपास करत आहे. यात जे कोणी दोषी आहे त्यांच्यावर योग्य कारवाई करण्यात येईल. हेमंत नगराळे, पोलीस आयुक्त मुंबई
रजनीश सेठ यांच्याकडे पाेलीस महासंचालकपदाचा अतिरिक्त कार्यभार -पोलीस महासंचालक पदाची अतिरिक्त जबाबदारी साेपविण्यात आलेले रजनीश सेठ हे १९८८च्या आयपीएस बॅचचे अधिकारी आहेत. गेल्या वर्षी २९ फेब्रुवारीपासून ते लाचलुचपत प्रतिबंधक विभागाचे प्रमुख म्हणून काम पाहत होते. यापूर्वी त्यांनी राज्याचे अप्पर महासंचालक (कायदा व सुव्यवस्था), गृह विभागाचे विशेष सचिव, मुंबईचे सहआयुक्त (कायदा व सुव्यवस्था) म्हणून जबाबदारी सांभाळली आहे. डिसेंबर २०२३ पर्यंत त्यांचा सेवा कार्यकाळ आहे.
संजय पांडे यांची होमगार्डमधून राज्य सुरक्षा महामंडळाच्या महासंचालकपदी बदलीज्येष्ठ आयपीएस अधिकारी संजय पांडे गेल्या सहा वर्षांपासून होमगार्डमध्ये कार्यरत होते. परमबीर सिंग यांची त्या ठिकाणी बदली केल्याने पांडे यांची राज्य सुरक्षा महामंडळात बदली करण्यात आली. या ठिकाणचा अतिरिक्त पदभार गेल्या वर्षीच्या ९ डिसेंबरपासून त्यांच्याकडेच होता.