Maharashtra Winter Session 2022: एकनाथ शिंदे यांनी बंडखोरी केल्यानंतर शिवसेनेला सातत्याने धक्के बसत आहेत. शिवसेनेतील हजारो कार्यकर्ते, शेकडो पदाधिकारी शिंदे गटात गेले. तसेच आणखी काही आमदार संपर्कात असल्याचा दावा शिंदे गटाकडून गेला जात आहे. एकीकडे ठाकरे गट आणि शिंदे गटातील संघर्ष सुरू असताना, दुसरीकडे महाराष्ट्र विधिमंडळाचे हिवाळी अधिवेशनातही ठाकरे गटाला मोठा धक्का बसला आहे. तालिध्यक्षांच्या यादीतून ठाकरे गटाला बेदखल करण्यात आले असून, एकाही सदस्याचे नाव नसल्याचे सांगितले जात आहे.
विधानसभेच्या तालिका सभाध्यक्षांच्या यादीतून शिवसेना उद्धव बाळासाहेब ठाकरे गटाला बेदखल करण्यात आले आहे. विधानसभाध्यक्ष राहुल नार्वेकर यांनी विधानसभा तालिका सभाध्यक्षांच्या नावाची घोषणा केली. यात ठाकरे गटाच्या एकाही सदस्यांचे नाव नाही. तालिका सभाध्यक्ष म्हणून मुख्यमंत्री एकनाथ शिंदे गटाचे संजय शिरसाट, भाजपचे समीर कुणावार, राष्ट्रवादी काँग्रेसचे सुनील भुसारा आणि काँग्रेसच्या सुभाष धोटे यांच्या नावांची घोषणा नार्वेकर यांनी सभागृहात केली.
विरोधक आणि सत्ताधाऱ्यांमध्ये जोरदार खडाजंगी
महाविकास आघाडी सरकारच्या काळात घेण्यात आलेल्या निर्णयांना आणि निधीला स्थगिती देण्यात आल्याच्या मुद्द्यावरुन अजित पवारांनी शिंदे-फडणवीस सरकारला यावेळी घेरण्याचा प्रयत्न केला. त्यावर उत्तर देताना फडणवीस आणि अजित पवार यांच्यात जुंपली. विधानसभेत गदारोळ झाला मग विधानसभा अध्यक्ष राहुल नार्वेकर यांनी सदस्यांना बसण्याची विनंती केल्यानंतर वाद शमला. बजेटमध्ये मंजूर झालेली कामे होती, ही महाराष्ट्रातील कामे आहेत. ही काही कर्नाटक आणि गुजरातची कामे नाही. आम्ही अनेक सरकारे बघितली. मनोहर जोशी, नारायण राणेंचे सरकार बघितले. देवेंद्रजी तुमचेही सरकार ५ वर्ष बघितले. सरकार येतात-जातात, तुमची पहिली टर्म आहे, पण आमच्या सात-सात टर्म झाल्या आहेत. पण अशी मंजूर झालेली व्हाईट बूक झालेली कामे कधी थांबली नव्हती, असा घणाघात अजित पवारांनी केला.
दरम्यान, विरोधी पक्षनेते अजित पवारांनी मुद्दा मांडला, पण मी त्यांना सांगू इच्छितो तुम्ही सात-सात वेळा निवडून आले असाल, आम्ही कमी निवडून आलो. पण काही गोष्टी तुमच्याचकडून शिकलो आहे. ज्यावेळी उद्धव ठाकरे मुख्यमंत्री झाले, तेव्हा अजित पवार उपमुख्यमंत्री बनले. त्यावेळी तुम्ही आमची सगळी कामे रोखली, माझ्या मतदारसंघातील कामे तुम्ही रोखली. अनेक वर्ष भाजपच्या लोकांना नवा पैसा दिला नाही. पण आम्ही बदल्याची भावना ठेवणार नाही. ज्या स्थगिती दिल्या आहेत, त्यापैकी ७० टक्के स्थगिती उठवली आहे, शेवटच्या स्थगिती आहेत, त्या कामांना मंजुरी देताना कोणत्याही तरतुदी पाळल्या नाहीत. नियम न पाळता खर्च केले. त्याचा पुनर्विचार करुन आवश्यक त्या स्थगिती उठवू आणि कुणावरही अन्याय होणार नाही, योग्य आणि आवश्यक निर्णय घेऊ, असे उत्तर देवेंद्र फडणवीस यांनी दिले.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"