मुंबई – राज्याचा २०२२-२३ चा अर्थसंकल्प उपमुख्यमंत्री आणि अर्थमंत्री अजित पवार यांनी विधानसभेत मांडला. २४ हजार ३५३ कोटींच्या अर्थसंकल्पात तरतूद करण्यात आली आहे. गेल्या अनेक दिवसांपासून पेट्रोल-डिझेलच्या किंमती गगनाला भिडल्या आहेत. या इंधनावरील करात कपात होईल अशी अपेक्षा सर्वसामान्यांनी व्यक्त केली होती. परंतु अर्थसंकल्पात त्यावर कुठलीही घोषणा करण्यात आली नाही.
मात्र अर्थमंत्री अजित पवारांनी(Ajit Pawar) नैसर्गिक वायूचा वापर वाढवण्याच्या दृष्टीने घरगुती पाईप गॅस, सीएनजीवर चालणारी वाहने, याचा वापर वाढावा. पर्यावरण पूरक नैसर्गिक वायूच्या वापरास प्रोत्साहन आणि सर्वसामान्य नागरिकांना दिलासा मिळण्यासाठी मूल्यवर्धित कराचा दर १३.५ टक्क्यांवरून ३ टक्के इतका केला आहे. त्यामुळे राज्याच्या तिजोरीत अंदाजे ८०० कोटी रुपयांची महसुली घट होणार आहे. अजित पवारांच्या या घोषणेमुळे राज्यात CNG आणि PNG गॅस स्वस्त होणार असून सर्वसामान्यांना मोठा दिलासा मिळाला आहे.
त्याचसोबत मुद्रांक शुल्कावरील दंडाच्या रक्कमेत माफ करण्याची अभय योजना राबवण्यात येत आहे. त्यामुळे १५०० कोटींची घट होण्याची शक्यता आहे. राज्यात जलवाहतूकीला चालना देण्यासाठी फेरी बोट, रो-रो महाराष्ट्र मेरिटाईम बोर्डाकडून आकारण्यात येणाऱ्या करात ३ वर्षासाठी सूट देण्यात येईल. बांधकाम व्यवसायाला चालना देण्यासाठी व गुंतवणूकदारांना प्रोत्साहन देण्यासाठी महाराष्ट्र मुद्रांक शुल्काशी दस्ताशी समायोजनेसाठी लागणाऱ्या कालावधीत १ वर्षाहून ३ वर्षापर्यंत वाढ करण्यात आली आहे.(Maharashtra Budget Live Session)
सोने स्वस्त होणार
सोने चांदीचे दागिने बनवणारे छोटे मोठे उद्योग, रिफायनरी व निर्यातीस चालना देण्यासाठी महाराष्ट्रात आयात होणाऱ्या सोने चांदीच्या डिलिव्हरी ऑर्डरच्या दस्तांवर महाराष्ट्र मुद्रांक अधिनियमानुसार आकारण्यात येणाऱ्या ०.१ टक्के मुद्रांक शुल्क माफ करण्याची घोषणा अजित पवारांनी केली आहे. त्यामुळे राज्याला १०० कोटींच्या महसुलीची तूट येण्याची शक्यता आहे.(Maharashtra Budget 2022 Speech)
पर्यटन विभागासाठी काय?
कोयना,जायकवाडी व गोसीखुर्द येथे जल पर्यटन प्रकल्प प्रस्तावित करण्यात येत आहे. जव्हार जि.पालघर, फर्दापूर जि.औरंगाबाद, अजिंठा,वेरूळ,महाबळेश्वर व लोणावळा येथे पर्यटन विकासाकरीता सुविधा निर्माण करण्यासाठी अनुदान देण्यात येईल. पुरातत्व स्मारकांच्या जतन, संवर्धन आणि दुरुस्तीसाठी जिल्हानिहाय “महावारसा सोसायटीची स्थापना केली जाईल. बाळासाहेब ठाकरे गोरेवाडा आंतरराष्ट्रीय प्राणी उद्यानात "आफ्रिकन सफारी" सुरु करणार आहे. पुणे वन विभागात बिबट्या सफारी सुरु करणार असल्याचंही अर्थसंकल्पात सांगण्यात आले.