बारामती - Supriya Sule at Ajit Pawar Home ( Marathi News ) लोकसभा निवडणुकीच्या तिसऱ्या टप्प्यातील मतदान सुरू आहे. मात्र बारामतीच्या राजकारणात नवा ट्विस्ट आला आहे. मतदान केंद्रावर मतदान करून सुप्रिया सुळे या अजित पवारांच्या घरी दाखल झाल्या आहेत. काटेवाडीतील अजित पवारांच्या निवासस्थानी सुप्रिया सुळे पोहचल्या. या राजकीय घडामोडीमुळे अनेकांच्या भूवया उंचावल्या आहेत.
ऐन मतदान सुरू असताना सुप्रिया सुळे यांनी अजित पवारांच्या घरी भेट दिल्याने अनेक तर्क वितर्क लढवले जात आहेत. सुप्रिया सुळेंनी ही भेट का घेतली हे अद्याप स्पष्ट नाही. मात्र सातत्याने सुप्रिया सुळेंकडून आमचे राजकीय मतभेद असले तरी कुटुंब म्हणून आम्ही एकच आहोत असं सांगत होते. त्यात सुप्रिया सुळे यांनी मतदानाच्या दिवशी अजित पवारांच्या घरी दाखल होणे यातून मतदारांमध्ये संभ्रमाची अवस्था निर्माण होण्याची शक्यता आहे.
गेल्या अनेक दिवसांपासून बारामतीच्या राजकीय आखाड्यात शरद पवार आणि अजित पवार एकमेकांसमोर उभे आहेत. सुप्रिया सुळे यांच्याविरोधात सुनेत्रा पवार या निवडणुकीच्या रिंगणात आहेत. त्यात अजित पवार महायुतीत आल्याने पवार कुटुंबातील वाद समोर आले. या निवडणुकीच्या प्रचारावेळी पवार कुटुंबातील सगळेच मैदानात उतरले होते. त्यात अजित पवारांचे सख्खे बंधू श्रीनिवास पवारही त्यांच्याविरोधात जात सुप्रिया सुळेंचा प्रचार करत होते.
बारामतीच्या शेवटच्या सभेतही शरद पवार गटाकडून अजित पवारांवर निशाणा साधला होता. रोहित पवार यांनी आक्रमकपणे अजित पवारांवर टीका करत भावूक झाल्याचेही पाहायला मिळाले. त्यानंतर रोहित पवारांच्या टीकेवर अजित पवारांनीही त्यांची खिल्ली उडवली होती. त्यात मतदान सुरू असताना सुप्रिया सुळे या काटेवाडीतील अजित पवारांच्या निवासस्थानी गेल्याने कुटुंब म्हणून आजही आम्ही एकत्रित आहोत असा संदेश सुप्रिया सुळेंना द्यायचा आहे का असादेखील प्रश्न निर्माण होतो.