सातारा - बिनधास्त बोलण्यासाठी प्रसिद्ध असलेले साताऱ्याचे खासदार उदयनराजे भोसले यांनी भारतीय जनता पक्षावर जोरदार टीका केली आहे. माढामधील लोकांना साताऱ्याचे खासदार कोण, माहित नाही, या सहकारमंत्री सुभाष देशमुख यांच्या वक्तव्याचा उदयनराजे यांनी आपल्या स्टाईलमध्ये समाचार घेतला. येथे आयोजित पत्रकार परिषदेत ते बोलत होते. यावेळी आमदार शशिकांत शिंदे उपस्थित होते.
मला फक्त समुद्राची लाट माहित आहे. जर साताराच्या जनतेला मी कोण आहे माहित नसतं, तर मोदींची जी काय 'सो कॉल्ड' लाट असताना मी निवडून आलो नसतो, असं उदयनराजे यांनी म्हटले. तसेच भाजपने मागील चार वर्षात ज्या पद्धतीने काम केले, त्यामुळे जनता भाजपला चांगल्या पद्धतीने पाणी पाजल्याशिवाय राहणार नाही, असंही यावेळी उदयनराजे यांनी म्हटले आहे.
तुम्ही सध्या शांत वाटत आहात, या प्रश्नावर उदयनराजे म्हणाले की, एखाद्यावर अन्याय होत असेल तर निवडणुका असो वा नसो, सत्ता असो नसो निश्चितच मी आक्रमक राहणार आणि लोकांना न्याय मिळवून देण्याचे काम करणार, परंतु आज आक्रमक होण्याची गरज नाही. तसेच मी कधीच चुकत नाही, पण तुम्ही चुका शोधू नका, अशी कोपरखळी देखील यावेळी उदयनराजे यांनी लगावली.
यावेळी आमदार शशिकांत शिंदे यांनी देखील सुभाष देशमुख यांच्यावर टीका केली. देशमुखांनी माढामधून लोकसभा निवडणूक लढवावी, त्यानंतरच त्यांना साताऱ्याची लाट काय असते हे उदयनराजे दाखवून देतील, असं शिंदे यांनी म्हटले.