स्वातंत्र्य सेनानी बेलाप्पा पेटकर अनंतात विलीन

स्वातंत्र्य सैनिक बेलाप्पा आसाराम आप्पा पेटकर यांचे वृध्दापकाळाने सोमवारी रात्री उपचारादरम्यान चिखली येथे प्राणज्योत मालवली

देऊळगांवराजा : स्वातंत्र्य लढय़ात सक्रीय सहभाग घेतलेले स्वातंत्र्य सैनिक बेलाप्पा आसाराम आप्पा पेटकर यांचे वृध्दापकाळाने सोमवारी रात्री उपचारादरम्यान चिखली येथे प्राणज्योत मालवली त्यांच्या पार्थिवावर शासकीय इतमामात मंगळवारी दुपारी देऊळगांवमही येथे अंत्यसंस्कार करण्यात आले. दि.१ जानेवारी १९३१ रोजी जन्मलेले बेलाप्पा पेटकर यांनी ऐन उमेदीच्या काळात गोवा मुक्ती संग्राम या लढयात १९५६ ते १९५८ या काळात लक्षणीय योगदान देशसेवेसाठी अर्पित केले होते. ज्वलंत विचार व देशप्रेमाची ओढ या ध्येयापोटी समाजात जनजागृतीचा वसा त्यांनी शेवटपर्यंत जपला. बेलाप्पा पेटकर यांनी स्वातंत्र्य लढयात केलेल्या कामगिरीची दखल घेत राज्य शासनाच्या वतीने तत्कालीन मुख्यमंत्र्यांनी सन्मानपत्र देऊन त्यांचा गौरव केला होता. स्वातंत्र्य सैनिक पेटकर यांनी प्रारंभी इंग्रजी विषयाचे शिक्षक व नंतर शासकीय नोकरीत प्रवेश करुन दि.५ जुलै १९५६ रोजी जि.प.मराठी प्राथमिक कन्या शाळा सिंदखेडराजा येथे शिक्षक म्हणून रुजू झाले. आणि दि.३0 जून १९८८ रोजी प्रभारी मुख्याध्यापक म्हणून सेवानवृत्त झाले. २५ वर्षापासून ते देऊळगांवराजा तालुक्यातील देऊळगांवमही येथे वास्तव्यास होते. ८३ वर्ष वय असलेल्या बेलाप्पा पेटकर यांची प्रकृती साथ देत नव्हती. सोमवारी दुपारी अस्वस्थ वाटू लागल्याने कुटूंबियांनी त्यांना तातडीने चिखलीला डॉ.सावजी हॉस्पीटलला दाखल केले. उपचारादरम्यान रात्री त्यांचे निधन झाले. मंगळवारी दुपारी देऊळगांवमही येथे स्मशानभूतीत शासकीय इतमामात अंत्यविधी पार पडला. जिल्हाधिकारी बुलडाणा यांच्या वतीने एसडीओ घोडके, पोलिस अधिक्षकांच्या वतीने ठाणेदार हिवाळे यांनी पुष्पचक्र अर्पण केले. पोलिस दलाच्या कर्मचार्‍यांनी बंदुकीच्या फैरी झाडून मानवंदना दिली. यावेळी पेटकर कुटूंबिय, नातलग, राजकीय, सामाजिक शैक्षणिक क्षेत्रातील मान्यवर उपस्थित होते. स्वातंत्र्य सैनिक बेलाप्पा पेटकर यांच्या पश्‍चात दोन मुले, एक मुलगी, सुना नातवंडे असा परिवार आहे.