सातारा: पुणे - बंगळुरू राष्ट्रीय महामार्गावर खांबाटकी बोगदाजवळ अपघात झाला आहे. बोगदा पार करून पुढे जाणाऱ्या खासगी बसला मागून वेगाने येणाऱ्या दूधाच्या टँकरने धडक दिल्याने हा अपघात झाला. टँकरची धडक बसला बसल्याने त्या बसची धडक त्याच्या पुढे असलेल्या ट्रकला बसली नंतर तो ट्रक रांगेत असलेल्या दुसऱ्या ट्रकवर धडकून हा अपघात झाला. या अपघातात नागपूरहून सहलीसाठी आलेले 12 विद्यार्थी व बस आणि टॅकरचालक जखमी झाले . एक विद्यार्थी गंभीर जखमी झाला असून त्याला उपचारार्थ पुणे येथे हलवण्यात आलं आहे .
घटनास्थळावरून मिळालेल्या माहितीनुसार, खांबाटकी बोगदा ते धोम -बलकवडी कालवा दरम्यान बुधवारी मध्यरात्री साडेअकराच्या सुमारास चार वाहनांचा अपघात झाला . खांबाटकी बोगदा ओलांडून पुणे बाजूकडे जाताना उतारावर काही वाहने थांबली होती . समोर वाहने थांबल्याने लक्झरी बसचालकाने गाडी थांबवली . त्याचवेळी पाठीमागून भरधाव आलेला दूध टँकरला ब्रेक न लागल्याने बसच्या पाठीमागील बाजूवर आदळून डाव्या बाजूच्या कठडयावर धडकला . टँकरच्या जोरदार धडकेने बस पुढे उभ्या असलेल्या ट्रकवर आदळली . त्यामुळे ट्रक दुसऱ्या ट्रकला धडकला . या अपघातामुळे रस्त्यावर काचा , बसमधील विद्यार्थ्यांच्या बॅगा, वस्तू विखूरल्या. दोन्ही वाहने रस्त्याच्या दोन्ही बाजूला गेल्याने वाहतूक ठप्प झाली .
घटनेची माहिती मिळताच शिरवळचे पोलीस निरीक्षक भाऊसाहेब पाटील, खंडाल्याचे सहायक पोलीस निरीक्षक स्मीता पाटील, सहायक पोलीस निरीक्षक मोहन कदम , शिरवळचे सहायक पोलीस निरीक्षक सुनिल पवार घटनास्थळी दाखल झाले . जखमी विद्यार्थ्यांना उपचारार्थ ग्रामीण रुग्णालयात दाखल करण्यात आलं . रस्त्यावर विखुरलेल्या काचा व इतर साहित्य बाजूला काढून रस्ता खुला केला. अपघातग्रस्त बस क्रेनच्या सहाय्याने बाजूला घेतल्यानंतर वाहतूक सुरळीत सुरू झाली .
भाविक अशोक बांते (वय १५, रा. ओम नगर सकरदरा नागपूर), कार्तिक किशोर ठाकरे (१५), आनिक्षा विजय घायवाट ( २०), संगिता गजानन पारतवार (६०), कमलाबाई तोलाराम सुतोणी (६५, र. पारतवार), अग्नी अनिल राऊत ( २०), देवेंद्र रमेश चौधरी ( २१), बस क्लिनर चुन्नाराम सलामी (२८, मध्यप्रदेश), मयुरी काशीनाथ लोनगाडगे (२०), प्रणय अरुण शिवणकर (१५), हर्षल लीलाधर बांते (१५), रागीनी विनोद देवडे ( २०), सतिश सुभाष शेटे (३२, नवे पारगांव, हातकणंगले कोल्हापूर), बसचालक बाळकृष्ण रामनरेश विश्वकर्मा (४९) अशी अपघातात जखमी झालेल्यांची नावं आहेत. यातील भाविकची प्रकृती गंभीर आहे.