प्राची पाटील,लोकमत न्यूज नेटवर्क
छत्रपती संभाजीनगर: ‘मला माहितेय, तुम्ही देशासाठी मोठे काम करत आहात. पण, बाबा, तुम्ही कधी येणार आहात? लवकर आम्हाला भेटायला या. मला बिस्कीट नको, चॉकलेट नको, मला फक्त तुम्ही पाहिजे’. ‘फादर्स डे’निमित्त शहरातील सैनिकांच्या मुलांनी आपल्या पित्याला ‘लोकमत’द्वारे खास संदेश दिला. आपल्या भावना व्यक्त करताना ही चिमुकली मुले भावुक झाल्याचेही पाहायला मिळाली.
प्रत्येकाच्या आयुष्याचा आधारस्तंभ असतो तोआई घराचे मांगल्य असते, तर बाप घराचे अस्तित्व. प्रत्येकाच्या आयुष्यातला आधारस्तंभ असतो बाबा. पण, त्यांच्याबद्दलच्या भावना व्यक्त करण्याची वेळ फार कमी येते. सीमेवर लढणारा सैनिक बाबा तर ग्रेटच. आपल्या मुलांपासून दूर-दूर राहताना त्याचाही जीव तीळतीळ तुटतो. पण, आपल्या भावनांना आवर घालत सीमेवर तो केवळ देशासाठी प्राणपणाने लढतो. त्यामुळेच आपला बाबा सैनिक असल्याचे त्यांची मुले अभिमानाने सांगतात.
ते जाताना खूप रडू येते लेह-लडाख सीमेवर तैनात असलेले जवान समाधान आहेर यांची दुसरीत शिकणारी मुलगी शिवकन्या म्हणाली, ‘माझे पप्पा सैनिक आहेत, याचा मला खूप अभिमान वाटतो. ते जेव्हा सुटीवर येतात, तेव्हा आम्ही खूप गप्पा मारतो, खेळतो, मजा करतो. पण, जेव्हा ते इथून जातात तेव्हा खूप रडू येते. माझे तुमच्यावर खूप प्रेम आहे.’
चॉकलेट घेऊन लवकर या जम्मूमध्ये तैनात जवान प्रवीण साळुंके यांचा चार वर्षांचा मुलगा युवराज निरागसपणे म्हणाला, माझे बाबा फौजी आहेत. ते वाईट लोकांसोबत युद्ध करतात. बाबा, मला चॉकलेट घेऊन तुम्ही लवकर या.
लवकर मला घ्यायला या सध्या कोलकात्यामधील पानागड येथे तैनात असलेल्या राजू साळुंके यांचा साडेपाच वर्षांचा मुलगा शिवांश म्हणाला, ‘मला बाबांची खूप आठवण येते. ते देशाची सेवा करतात. ते मला फोनवर म्हणाले होते की, मी तुला घ्यायला येईन. पण, बाबा अजून आलेच नाहीत. मला चॉकलेट नको, पण तुम्ही बाबाला सांगा की मला लवकर घ्यायला या. मला त्याच्याबरोबरच जायचे आहे.