Ajit Pawar Died in Plane Crash: उपमुख्यमंत्री अजित पवार यांचं बुधवारी विमान अपघातात निधन जालं. निवडणुकीच्या प्रचारासाठी अजित पवारबारामतीला येत होते. मात्र विमान उतरत असतानाच ते कोसळले आणि स्फोट होऊन अजित पवार यांच्यासह पाच जणांचा दुर्दैवी मृत्यू झाला. अजित पवार यांच्यावर आज बारामतीतल्या विद्या प्रतिष्ठानच्या मैदानात अंत्यसंस्कार होणार आहे. नागरी विमान वाहतूक महासंचालनालयाने आता हा अपघात नेमका कसा झाला याची माहिती दिली आहे.
बारामती येथील विमानतळावर बुधवारी सकाळी ८.४३ च्या सुमारास विमानाचा अपघात घडला. लँडिंगच्या प्रयत्नात असताना VT-SSK हे विमान धावपट्टीच्या कडेला कोसळले आणि विमानाला आग लागली. या घटनेमुळे परिसरात खळबळ उडाली आणि प्रशासनाने तातडीने बचावकार्य हाती घेतले आहे. मात्र आगीचे लोळ प्रचंड असल्याने कोणीही वाचू शकले नाही.
नेमका घटनाक्रम काय?
नागरी विमान वाहतूक महासंचालनालयाने माहितीनुसार आणि एटीसीकडून प्राप्त झालेल्या विधानानुसार, या अपघाताचा घटनाक्रम समोर आला आहे.
सकाळी ८:१८ वाजता: विमान VT-SSK ने बारामती तळाशी पहिला संपर्क साधला. त्यावेळी विमान बारामतीपासून ३० समुद्री मैल अंतरावर होते. पुणे अप्रोच केंद्राने या विमानाला बारामतीकडे जाण्याची आणि दृश्य हवामान परिस्थितीत उतरण्याची परवानगी दिली होती.
हवामानाची विचारणा: वैमानिकाने बारामती येथील वाऱ्याचा वेग आणि दृश्यमानतेबाबत विचारणा केली. त्यावेळी हवा शांत असून दृश्यमानता साधारण ३००० मीटर असल्याचे त्यांना कळवण्यात आले.
पहिला अयशस्वी प्रयत्न: विमान रनवे ११ च्या अंतिम टप्प्यावर आले होते. मात्र, दृश्यमानता कमी असल्याने वैमानिकाला धावपट्टी दिसली नाही. त्यामुळे त्यांनी 'गो-अराउंड' (पुन्हा हवेत जाण्याचा निर्णय) घेतला.
दुसरा प्रयत्न आणि अपघात: काही वेळातच विमानाने पुन्हा रनवे ११ साठी अप्रोच केला. एटीसीने धावपट्टी दिसत आहे का, याची विचारणा केली असता, सुरुवातीला नकार मिळाला. परंतु, काही सेकंदातच वैमानिकाने "रनवे दिसत आहे" असा संदेश दिला.
सकाळी ८:४३ वाजता: विमानाला रनवे ११ वर उतरण्याची अंतिम परवानगी देण्यात आली. मात्र, वैमानिकाकडून या परवानगीचा कोणताही 'रीडबॅक' (प्रतिसाद) मिळाला नाही.
सकाळी ८:४४ वाजता: अवघ्या एका मिनिटात एटीसी कर्मचाऱ्यांच्या निदर्शनास आले की, रनवे ११ च्या थ्रेशोल्डजवळ (धावपट्टीच्या सुरुवातीच्या भागाजवळ) आग लागली आहे.
बचावकार्य आणि तपास
अपघात होताच विमानतळावरील आपत्कालीन सेवा आणि अग्निशमन दल घटनास्थळी दाखल झाले. विमानाचा ढिगारा धावपट्टीच्या डाव्या बाजूला विखुरलेला असून विमानाचे मोठे नुकसान झाले आहे.
या घटनेचे गांभीर्य लक्षात घेऊन एएआयबीने तातडीने या प्रकरणाचा तपास आपल्या हाती घेतला आहे. एएआयबीचे महासंचालक स्वतः तपासासाठी घटनास्थळी दाखल होत आहेत. हा अपघात तांत्रिक बिघाडामुळे झाला की हवामानातील बदलामुळे, याचा शोध आता घेतला जात आहे.
Web Summary : Ajit Pawar tragically died in a Baramati plane crash during landing. Poor visibility led to a failed first attempt ('go-around'). The second attempt resulted in a fatal crash near the runway. Investigation underway.
Web Summary : बारामती में लैंडिंग के दौरान विमान दुर्घटना में अजित पवार की दुखद मृत्यु हो गई। खराब दृश्यता के कारण पहला प्रयास विफल रहा ('गो-अराउंड')। दूसरा प्रयास रनवे के पास घातक दुर्घटना में परिणत हुआ। जांच जारी है।