एकीकडे राज्यात राजकीय गुंतागुंत वाढलेली असताना उपमुख्यमंत्री देवेंद्र फडणवीस यांच्या भविष्याची दिशा ठरविणारा निकाल येत्या ८ सप्टेंबरला जाहीर होणार आहे. फडणवीस यांनी विधानसभा निवडणुकीत दाखल केलेल्या शपथपत्रात दोन गुन्ह्यांची माहिती लपविल्याप्रकरणावरील याचिकेवर नागपूरच्या जिल्हा व सत्र न्यायालयातील प्रथम श्रेणी न्यायदंडाधिकारी दोन दिवसांत निकाल जाहीर करणार आहेत.
या प्रकरणाचा निकाल आज येणार होता, परंतू तो ८ सप्टेंबरला पुढे ढकलण्यात आला आहे. फडणवीस यांनी २०१४ साली झालेल्या विधानसभा निवडणुकांसाठी दाखल केलेल्या शपथपत्रात दोन गुन्ह्यांची माहिती लपवली, असा आरोप ईडी प्रकरणातील आरोपी ॲड. सतीश उके यांनी केला आहे. उके यांनी फडणवीस यांची आमदारकी रद्द करावी, या मागणीसाठी काही वर्षांपूर्वी उच्च न्यायालय, सर्वोच्च न्यायालयाचे दरवाजे ठोठावले होते. यावर सर्वोच्च न्यायालयाने या प्रकरणी याचिका दाखल करण्यासाठी खालच्या कोर्टात जाण्यास सांगितले होते.
या प्रकरणात फडणवीस यांच्यावर गुन्हा दाखल करून खटला चालविण्यात यावा, अशी तक्रार उके यांनी प्रथम श्रेणी न्याय दंडाधिकारी न्यायालयापुढे केली होती. यावर दोन्ही बाजुंनी युक्तीवाद पूर्ण झाला आहे. 2014 च्या विधानसभा निवडणुकीसाठीच्या उमेदवारी अर्जासोबतच्या शपथपत्रात दोन गुन्हे नजरचुकीने नमूद करायचे राहिल्याचं देवेंद्र फडणवीस यांच्यावतीने त्यांच्या वकिलांनी न्यायालयासमोर सांगितले आहे.