BJP Candidate List ( Marathi News ) : लोकसभा निवडणुकीत मराठा आरक्षण आंदोलक मनोज जरांगे पाटील यांनी घेतलेल्या भूमिकेचा मराठवाड्यात सत्ताधारी महायुतीला मोठा फटका बसला होता. मराठवाड्यात छत्रपती संभाजीनगर वगळता अन्य सर्व मतदारसंघांमध्ये महायुतीचे उमेदवार पराभूत झाले. या पार्श्वभूमीवर विधानसभा निवडणुकीत जरांगे फॅक्टरचा फटका बसू नये, यासाठी भाजपकडूनही मोर्चेबांधणी करण्यात आल्याचं दिसत असून याचे प्रतिबिंब भाजपच्या पहिल्या उमेदवारी यादीतही पाहायला मिळाले. भाजपने विधानसभेसाठी काल ९९ उमेदवारांची पहिली उमेदवार यादी जाहीर केली असून यामध्ये मराठवाड्यातील १६ जागांचा समावेश आहे. या १६ पैकी १० जागांवर भाजपने मराठा उमेदवार दिले आहेत.
आरक्षण आंदोलनामुळे मराठवाड्यातील सामाजिक वातावरण ढवळून निघालं आहे. लोकसभा निवडणुकीत झालेलं जातीय ध्रुवीकरण लक्षात घेता भाजपने विधानसभा निवडणुकीत सर्वसाधारण मतदारसंघांमध्ये मराठा उमेदवारांना प्राधान्य देण्याचा निर्णय घेतल्याचं दिसत आहे. भाजपने काल जाहीर केलेल्या १६ पैकी तीन जागा या अनुसूचित जाती आणि अनुसूचित जमातींसाठी राखीव आहेत. अन्य १३ मतदारसंघांपैकी १० मतदारसंघांमध्ये पक्षाने मराठा उमेदवार दिले असून उर्वरित तीन मतदारसंघांपैकी दोन मतदारसंघांमध्ये ओबीसी तर एका मतदारसंघात जैन उमेदवाराला संधी दिली आहे.
मराठवाड्यातील कोणत्या मराठा उमेदवारांना भाजपकडून उमेदवारी?
हिंगोली - तानाजी मुटकुळेतुळजापूर - राणाजगजीतसिंह पाटीलजिंतूर - मेघना बोर्डीकरनायगाव - राजेश पवारभोकर - श्रीजया चव्हाणफुलंब्री - अनुराधा चव्हाणभोकरदन - संतोष दानवेपरतूर - बबनराव लोणीकरऔसा - अभिमन्यू पवारनिलंगा - संभाजी पाटील निलंगेकर