गरिबांच्या औषधात कमिशन

औषधांची बिले काढण्यासाठी ‘कमिशनखोरी’ करणाऱ्या दोन अधिकाऱ्यांना चांगलेच महागात पडले. अधिष्ठाता डॉ. अभिमन्यू निसवाडे यांनी याची स्वत:हून दखल घेत अकाऊंट विभागातील दोन अधिकाऱ्यांची

अधिकाऱ्यांचे बिंग फुटले : अधिष्ठात्यांची धडक कारवाई
नागपूर : औषधांची बिले काढण्यासाठी ‘कमिशनखोरी’ करणाऱ्या दोन अधिकाऱ्यांना चांगलेच महागात पडले. अधिष्ठाता डॉ. अभिमन्यू निसवाडे यांनी याची स्वत:हून दखल घेत अकाऊंट विभागातील दोन अधिकाऱ्यांची उचलबांगडी केली. बुधवारी झालेल्या या कारवाईने एकच खळबळ उडाली आहे.
मेडिसीनच्या अकाऊंट विभागातील एक तर नर्सिंग विभागातील एक अधिकारी औषधांची बिले काढण्यासाठी कमिशन घेत असल्याची तक्रार मेडिकलच्या औषध पुरवठादारांनी शासनाच्या औषधी व द्रव्य विभागाच्या प्रधान सचिव मनीषा म्हैसकर यांच्याकडे केली. म्हैसकर यांनी याची गंभीर दखल घेतली. त्यानंतर औषधी व द्रव्य विभागाकडून कानउघाडणी केल्यानंतरही अधिकारी कानाडोळा करीत होते.
यामुळे पुरवठादार चांगलेच त्रस्त झाले. मंगळवार ४ नोव्हेंबर रोजी औषध पुरवठादारांनी अधिष्ठाता डॉ. अभिमन्यू निसवाडे यांना संबंधित अधिकाऱ्यांचे ‘कारनामे’ सांगितले. या अधिकाऱ्यांविरूद्ध यापूर्वी अनेक तक्रारी होत्या. मंगळवारी थेट पुरवठादारच तक्रारी घेऊन आल्याने डॉ. निसवाडे यांनी थेट कारवाई करीत त्याच दिवशी एका अधिकाऱ्याची पॅथॉलॉजी विभागात उचलबांगडी केली, तर दुसऱ्या अधिकाऱ्याची रोगप्रतिबंधक व सामाजिक औषधशास्त्र विभागात (पीएसएम) करून नर्सिंग विभागाला गैरव्यवहारमुक्त केले. डॉ. निसवाडे यांनी तक्रारीची दखल घेत कारवाई केल्याने बेजबाबदार अधिकाऱ्यांमध्ये खळबळ उडाली आहे. (प्रतिनिधी)