CM Devendra Fadnavis:शिवसेना ठाकरे गटातून हकालपट्टी झाल्यानंतर सुधाकर बडगुजर यांनी आगामी महापालिका निवडणुकीच्या पार्श्वभूमीवर भाजपमध्ये प्रवेश केला. स्थानिक नेत्यांचा विरोध धुडकावत बडगुजर यांना भाजपमध्ये प्रवेश देण्यात आला. गुन्हा दाखल झाल्यानंतर भाजपच्या मंत्र्यांनीच सुधाकर बडगुजर यांच्या विरोधात राळ उठवली होती. त्यानंतर आता मुख्यमंत्री देवेंद्र फडणवीस यांनी सुधाकर बडगुजर यांच्या पक्षप्रवेशावर भाष्य केले आहे. सुधाकर बडगुजर विरोधी पक्षात असताना त्यांच्यावर कोणतीही कारवाई झाली नाही, बडगुजर यांच्याविरोधात गुन्हा दाखल झाल्यानंतर चौकशीअंती कोणतीही कारवाई झाली नाही, असं मुख्यमंत्री देवेंद्र फडणवीस म्हणाले.
"सुधाकर बडगुजर यांच्यावर टीका झाली होती. नितेश राणे यांनी एक व्हिडीओ देखील समोर आणला होता. पण त्यानंतर त्यांच्या विरोधात जो गुन्हा दाखल झाला त्याची चौकशी झाल्यानंतर बडगुजर यांच्यावर कुठलीही कारवाई झालेली नाही. हे सर्व ते त्या पक्षात असताना झालं. विधानसभा निवडणुकीच्या आधीच हे सगळं घडलं आहे. विधानसभा निवडणुकीत ते आमच्या विरुद्ध उभे होते. निवडणुकीनंतर त्यांनी पक्षामध्ये येण्याची इच्छा दाखवली. निवडणुकीत त्यांनी देखील भरपूर मतं घेतली आहेत. आपल्या पक्षात कुणी येत असेल तर आपण त्याचे स्वागत करतो. अपेक्षा हीच असते की त्यांचा जुना इतिहास वागण्याची पद्धत बाजूला ठेवून त्यांनी भाजपच्या निती नियमांनी वागले पाहिजे,"
"पक्षप्रवेश ठरला त्यावेळेस आम्ही ही जबाबदारी गिरीश महाजन यांच्याकडे दिली होती. चंद्रशेखर बावनकुळे यांना त्याच दिवशी पक्षप्रवेश आहे याची कल्पना नव्हती. त्यांचा कुठेही विरोध नव्हता. पक्षप्रवेशासाठी ते स्वतः हजर होते. स्थानिक स्तरावर आमच्यामध्ये त्यांना विरोध झाला. त्यांनाही आम्ही समजवून सांगितले आहे की, आपल्याला पक्ष वाढवायचा आहे," असेही मुख्यमंत्री देवेंद्र फडणवीस म्हणाले.