जम्मू काश्मीरमध्ये एकेकाळी मेहबुबा मुफ्ती या भाजपचा मैत्रिण होत्या. त्यांनी दहशतवाद्यांना जेव्हा स्वातंत्र्य सैनिकांचा दर्जा देण्य़ाचा प्रयत्न केला तेव्हा भाजपाने आम्ही सत्तेतून बाहेर पडणार नाही असे सांगितले होते. आता त्याच मुफ्ती काश्मीर पंडितांवर अश्रू गाळत आहेत. हे भाजपाचे पाप असल्याचा आरोप शिवसेना नेते आणि राज्यसभा खासदार संजय राऊत यांनी केला आहे.
याचबरोबर राऊत यांनी चंद्रकांत पाटलांवरही तोंडसुख घेतले आहे. चमचेगिरीची हद्द झाली आहे. गेल्या ६० वर्षांत चमचेगिरी झाली. गांधींचेही चमचे होते. परंतू असे चमचे आम्ही आजवर पाहिले नाहीत, असे राऊत यांनी म्हटले. महाराष्ट्रातील भाजपाचे प्रदेशाध्यक्ष चंद्रकांत पाटील यांनी मोदी २२ तास काम करत असल्याचे म्हटले होते. याचा राऊतांनी समाचार घेतला.
चंद्रकांत पाटलांनी एक ऐतिहासिक विधान केले आहे. या जगात दुसरं कोणी काम करत नाही. फक्त पंतप्रधान मोदी हे 22 तास काम करतात त्यांना फक्त दोन तास जेमतेम झोप मिळते. जी दोन तास मोदींना झोप मिळते ती देखील मिळू नये, यावर पाटील संशोधन करत आहेत. हे ऐकून मोदींची ती दोन तासांची झोपही उडाली असेल, अशी मिश्किल टिपण्णी राऊत यांनी केली.