"एवढी बडबड करता ना, मग जाऊ द्या ना त्यांना ईडीसमोर"; नारायण राणेंचा राऊतांवर निशाणा

भाजप नेते नारायण राणे, यांनी शिवसेना नेते संजय राऊत यांच्या पत्नी वर्षा राऊत यांना ईडीने पाठविलेल्या नोटिशीचे समर्थन केले आहे.

मुंबई - शिवसेना नेते संजय राऊत यांनी आपली पत्नी वर्षा राऊत यांना ईडीची नोटीस आल्यानंतर सोमवारी दुपारी पत्रकार परिषद घेऊन आपली भूमिका मांडली. यावेळी त्यांनी भाजपवर थेट निशाणा साधला. केंद्रातील सत्ताधाऱ्यांना जेव्हा विरोधकांना राजकीयदृष्ट्या संपवता येत नाही, तेव्हा ईडी, सीबीआयसारखी हत्यारे वापरावी लागतात. यामुळेच वर्षभरात शरद पवार, प्रफुल्ल पटेल, एकनाथ खडसे, प्रताप सरनाईकांना ईडीकडून नोटीसा पाठवण्यात आल्या, असे संजय राऊत यांनी म्हटले होते. यावर आता भाजप नेते नारायण राणे यांनी राऊतांवर निशाणा साधला आहे.

भाजप नेते नारायण राणे, यांनी शिवसेना नेते संजय राऊत यांच्या पत्नी वर्षा राऊत यांना ईडीने पाठविलेल्या नोटिशीचे समर्थन केले आहे. टीव्ही-9 सोबत बोलताना राणे म्हणाले, “संजय राऊत एवढी बडबड करता ना, मग जाऊदे ना त्यांना ईडीच्या समोर. पुरावे असल्याशिवाय ईडी आणि सीबीआय चौकशी करत नाही. पुरावा लागतो. तेव्हाच ते नोटीस पाठवतात आणि तपास करता,” अशा शब्दात राणे यांनी राऊतांवर निशाणा साधला. एवढेच नाही, तर भाजप ईडीचा वापर करत नाही. केंद्र सरकारअंतर्गत ईडी आणि सीबीआय आहे, असा टोलाही त्यांनी राऊतांना लगावला.

काय म्हणाले होते राऊत - राऊत म्हणाले, गेल्या वर्षभरापासून भाजपचे महत्त्वाचे नेते आणि काही हस्तक मला सातत्याने भेटायचा प्रयत्न करत आहेत. सरकारच्या मोहात पडू नका. आम्ही सरकार पाडण्याची पूर्ण तयारी केली आहे, असे सांगत ते मला धमकावत आहेत. आमच्याकडे ईडी, सीबीआय आणि आयकर विभाग आहे, आम्ही तुम्हा सर्वांना टाईट करणार आहोत, अशी धमकीही मला दिली जात आहे. पण मीही त्यांचा बाप आहे, असेही राऊत म्हणाले होते.

हस्तक सरकार पाडण्यात अपयशी ठरले, कारण... -भाजपच्या या हस्तकांनी मला 22 आमदारांची यादी दाखवली. त्यात शिवसेना, राष्ट्रवादी आणि काँग्रेसच्या आमदारांची नावे होती. त्यांच्यावर ईडीचा दबाव आणून त्यांचे राजीनामे घेतले जातील आणि सरकार पाडले जाईल, असे मला सांगितले आहे. प्रताप सरनाईक हे त्याचे टोकून आहे. आम्ही सरकार पाडल्याशिवाय राहणार नाही. आमची तयारी झाली आहे, असेही त्यांनी म्हटले आहे, असा खळबळजनक आरोप राऊतांनी केला होता. मात्र, हे हस्तक सरकार पाडण्यात अपयशी ठरले, कारण त्यांची डेडलाईन नोव्हेंबरची होती. यामुळेच सरकारच्या खंद्या समर्थकांना आणि सरकार बनविण्याच्या प्रक्रियेतील महत्त्वाच्या नेत्यांना ईडीमार्फत त्रास देण्याचे काम सुरू आहे, असा दावाही राऊतांनी यावेळी केला होता.