Ajit Pawar Death in Plane Crash: राष्ट्रवादी काँग्रेस(अप) पक्षाचे प्रमुख आणि महाराष्ट्राचे उपमुख्यमंत्री अजित पवार यांचे आज(दि.28) सकाळी बारामती येथे विमान अपघातात दुःखद निधन झाले. या दुर्दैवी घटनेमुळे सहा वेळा राज्याच्या उपमुख्यमंत्रिपदाची शपथ घेणाऱ्या अजितदादांचे मुख्यमंत्रिपदाचे स्वप्न मात्र अपुरे राहिले. अनेकवेळा त्यांनी मुख्यमंत्री होण्याची इच्छाही बोलून दाखवली होती.
कर्मठ आणि शिस्तप्रिय नेता
अजित पवार हे अत्यंत कर्मठ आणि वेळेचे काटेकोर पालन करणारे नेते म्हणून ओळखले जात. अनेक नेते किंवा सरकारी अधिकारी कार्यक्रमांना उशिरा पोहोचायचे, पण अजित पवार नेहमी वेळेतच कार्यक्रमठिकाणी हजर राहत. प्रशासनावर मजबुत पकड असलेल्या अजितदादांनी अधिकाऱ्यांच्या चांगल्या कामाची कौतुक केलेच, पण वेळप्रसंगी त्यांना फटकारले सुद्धा. काँग्रेस, शिवसेना आणि भाजपच्या नेतृत्वाखालील विविध सरकारांमध्ये उपमुख्यमंत्री होण्याचा विक्रम त्यांच्या नावावर आहे.
चढ-उतारांनी भरलेला राजकीय प्रवास
अजित पवारांचा राजकीय प्रवास नेहमीच चढ-उतारांनी भरलेला राहिला. कथित 70 हजार कोटी रुपयांच्या सिंचन घोटाळ्यापासून ते पुण्यातील त्यांच्या मुलगा पार्थ पवार यांच्या जमीन व्यवहारांवरील वादांपर्यंत...अनेक प्रसंग त्यांनी पाहिले. तरीही प्रत्येकवेळी त्यांनी स्वतःला राजकीयदृष्ट्या सावरले. ‘दादा’ या प्रेमळ नावाने ओळखले जाणारे अजित पवार स्पष्टवक्तेपणासाठी प्रसिद्ध होते. विशेषतः ग्रामीण भागातील सभांमध्ये ते थेट आणि रोखठोक भाषेत मत मांडत.
अजितदादा, असे अचानक निघून जाणे बरोबर नाही..!
वादग्रस्त विधाने आणि माफी
2013 मध्ये पाणी आणि वीजटंचाईवर केलेल्या विधानांमुळे अजित पवार मोठ्या वादात सापडले होते. सोलापूरच्या दुष्काळग्रस्त भागातील शेतकरी भैया देशमुख यांच्या उपोषणावर त्यांनी केलेली टिप्पणी तीव्र टीकेचा विषय ठरली होती. तसेच वीज खंडित होण्यावरून केलेल्या एका विधानावरही मोठा वाद झाला, ज्यामुळे त्यांना जाहीर माफी मागावी लागली.
2023 मध्ये काकांविरोधात बंड
जुलै 2023 मध्ये राष्ट्रवादी काँग्रेस पार्टीचे संस्थापक शरद पवार यांच्या विरोधात बंड पुकारत अजित पवारांनी पक्षाचे नाव, चिन्ह आणि बहुसंख्य आमदार आपल्या बाजूने वळवले. लोकसभा निवडणुकीत त्यांच्या पक्षाला अपेक्षित यश न मिळाल्यानंतर, अवघ्या काही महिन्यांत झालेल्या विधानसभा निवडणुकीत भाजपसोबतच्या युतीत 41 जागा जिंकून त्यांनी टीकाकारांना प्रत्युत्तर दिले.
सत्तेत भूमिका मजबूत
2024 च्या विधानसभा निवडणुकांनंतर अजित पवारांनी राज्याच्या राजकारणातील आपली पकड अधिक मजबूत केली. भाजप आणि एकनाथ शिंदे यांच्या नेतृत्वाखालील शिवसेनेसह युतीत असूनही, आपण विकासासाठी सत्तेत सहभागी झालो असून आपल्या प्रगतिशील विचारधारेपासून ढळलो नाही, असे ते सातत्याने सांगत होते. राजकीय चर्चांमध्ये देवेंद्र फडणवीस आणि एकनाथ शिंदे यांच्यातील कथित सत्तासंघर्षावर भर असतानाही अजित पवार आपली पक्षसंघटना आणि मंत्रालयांवर लक्ष केंद्रित करत होते.
1991 पासून बारामतीचा राजकीय किल्ला
22 जुलै 1959 रोजी आशा आणि अनंतराव पवार यांच्या पोटी जन्मलेल्या अजित पवारांनी 1982 मध्ये राजकारणात प्रवेश केला. 1991 मध्ये ते बारामती लोकसभा मतदारसंघातून खासदार झाले आणि नंतर काका शरद पवार यांच्यासाठी ती जागा सोडली. त्यानंतर 1991 पासून सलग आठ वेळा ते बारामतीचे आमदार राहिले. अर्थ व नियोजन मंत्री म्हणून त्यांनी महत्त्वाची भूमिका बजावली. 2026-17 चा राज्याचा अर्थसंकल्प मांडण्याची जबाबदारीही त्यांच्यावर होती, मात्र त्यापूर्वीच त्यांचे विमान अपघातात दुर्दैवी निधन झाले.
Web Summary : Ajit Pawar, NCP leader and Deputy CM, tragically died in a plane crash. A strict leader, his career saw controversies, political maneuvers, and a recent split from Sharad Pawar. Baramati MLA since 1991, his CM aspirations remained incomplete.
Web Summary : राकांपा नेता और उपमुख्यमंत्री अजित पवार का विमान दुर्घटना में दुखद निधन। एक सख्त नेता, उनके करियर में विवाद, राजनीतिक चालें और शरद पवार से हाल ही में विभाजन देखा गया। 1991 से बारामती विधायक, उनकी मुख्यमंत्री बनने की आकांक्षा अधूरी रही।