गुनामध्ये भीषण अपघात, डंपरवर धडकून बसने घेतला पेट, १३ जणांचा जळून मृत्यू 

Bus Accident In Guna: मध्य प्रदेशमधील गुना येथे भीषण अपघात घडला आहे. येथे बस आणि डंपरची समोरासमोर धडक होऊन बस उलटली. त्यानंतर बसने पेट घेतल्याने त्यात जळून १३ प्रवाशांचा मृत्यू झाला.

मध्य प्रदेशमधील गुना येथे भीषण अपघात घडला आहे. येथे बस आणि डंपरची समोरासमोर धडक होऊन बस उलटली. त्यानंतर बसने पेट घेतल्याने त्यात जळून १३ प्रवाशांचा मृत्यू झाला. तर इतर २५ प्रवाशांना बसच्या काचा फोडून बाहेर पडत कसाबसा आपला जीव वाचवला.

मिळालेल्या माहितीनुसार बस क्रमांक एमपी ०८ पी ०१९९ ही बस २७ डिसेंबर रोजी रात्री सुमारे ८.३० च्या सुमारास गुना येथून आरोनकडे निघाली होती. सुमारे २५ मिनिटांनंतर बजरंगगड ठाण्यापासून ५ किमी आधी या बसची टक्क एका भरधाव डंपरसोबत झाली. ही धडक एवढी भयंकर होती की त्यात टक्कर होताच बस रस्त्यावर पलटी झाली. तसेच बसला आग लागली. आत अडकलेल्या प्रवाशांनी आरडाओरडा सुरू केला. लोक काही समजण्यापूर्वीच आगीने अक्राळविक्राळ रूप धारण केले. या दुर्घटनेत १२ प्रवाशांचा जागीच जळून मृत्यू झाला.

मिळालेल्या माहितीनुसार सिकरवार ट्रॅव्हल्सची ही बस १७ फेब्रुवारा २०२२ पासून अनफिट होती. तरीही ती चालवली जात होती. धक्कादायक बाब म्हणजे या बसला विमाही उतरवलेला नव्हता. या प्रकरणी आरटीओची बेफिकीरी समोर आली आहे. दुर्घटनेनंतर पोलिसांनी ५ मृतदेह ताब्यात घेतल्याचे सांगितले आहे. इतर मृतदेहांची ओळख पटवण्याचं काम सुरू आहे. बस जळाल्याने मृतदेहांची ओळख पटवण्यात अडचणी येत आहेत.

मध्य प्रदेशचे मुख्यमंत्री मोहन यादव यांनी या दुर्घटनेबाबत दु:ख व्यक्त केले आहे. तसेच अपघाताच्या चौकशीचे आदेश दिले आहेत. मुख्यमंत्र्यांनी मृतांना प्रत्येकी ४ लाख आणि जखमींना ५० हजार रुपये मदत देण्याची घोषणा केली आहे. असे अपघात पुन्हा होऊ नयेत म्हणून योग्य त्या उपाययोजना करण्याचे आदेश त्यांनी परिवहन विभागाला दिले आहेत.