निलंगा (जि. लातूर) : तालुक्यातील येलमवाडी येथील एका तरुणाचा अनसरवाडा रोडवर खून झाल्याची घटना बुधवारी समोर आली. विकास नामदेव थोरमोटे (वय २८) असे खून झालेल्या तरुणाचे नाव आहे. याबाबत निलंगा पाेलिस ठाण्यात गुन्हा दाखल करण्याची प्रक्रिया सुरू आहे.
पाेलिसांनी सांगितले की, निलंगा तालुक्यातील येलमवाडी येथील विकास नामदेव थोरमोटे हा तरुण शेतीसह ट्रॅक्टरचालक म्हणून काम करत होता. मंगळवारी रात्री आठ वाजण्याच्या सुमारास कोणाला तरी फोनवर बोलताना शिवीगाळ करत तो घरातून बाहेर पडला. थाेड्या वेळानंतर त्याचा मोबाइल बंद दाखवत असल्याने घरच्या मंडळींनी निलंगा येथील नातेवाईक आणि मित्रांकडे चाैकशी करत शोध घेतला असता ताे आढळून आला नाही. बुधवारी सकाळी निलंगा शहरातील अशोकनगर भागातून अनसरवाडा जाणाऱ्या मार्गालगत विकास थाेरमाेटे याचा मृतदेह नग्नावस्थेत आढळून आला. घटनास्थळी नातेवाईक तातडीने दाखल झाले. त्यांनी निलंगा येथील उपविभागीय पोलिस अधिकारी नितीन कटेकर, पोलिस निरीक्षक बाळकृष्ण शेजाळ यांना माहिती दिली. त्यांनी घटनास्थळी दाखल हाेत पंचनामा केला. मयत विकासचे कपडे मृतदेहापासून दूरवर पडलेले आढळून आले. घटनास्थळी श्वान आणि फिंगरप्रिंट पथकाला पाचारण करण्यात आले हाेते. निलंगा उपजिल्हा रुग्णालयात शवविच्छेदन करण्यात आले. येलमवाडी येथे सायंकाळी मृतदेहावर अंत्यसंस्कार करण्यात आले.
तीन-चार संशयितांना पाेलिसांनी घेतले ताब्यात...
विकास थोरमोटे याच्या मोबाइल काॅल्सचा डेटा, लोकेशन आणि सीडीआर काढून पोलिस वेगवेगळ्या दिशेने तपास करत आहेत. दरम्यान, तीन-चार संशयितांना ताब्यात घेतले आहे. हा खून काेणत्या कारणाने झाला, याचाही शाेध पाेलिस घेत आहेत.