Latur: उदगीरमध्ये अनधिकृत खताचा साठा, विक्री; साडेपाच लाखांचा मुद्देमाल जप्त

उदगीरनजीकच्या निडेबन येथील कृष्णनगरात अनधिकृत खताचा साठा व विक्री होत असल्याची माहिती कृषी विभागास मिळाली.

लातूर/ उदगीर : उदगिरातील निडेबन येथे अनधिकृत खताचा साठा करून विक्री करण्यात येत असल्याचे समजल्याने कृषी विभागाच्या पथकाने बुधवारी धाड टाकली. त्यात पाच लाख ६२ हजार ७५० रुपयांचे खत जप्त करण्यात आले. याप्रकरणी उदगीर ग्रामीण पोलिस ठाण्यात एकाविरुद्ध गुन्हा दाखल करण्यात आला आहे.

खरीप हंगामासाठी शेतकरी बी-बियाणे, खते खरेदी करीत आहेत. जिल्ह्यात कुठेही अनधिकृत बी-बियाणे, खते विक्री होऊ नयेत तसेच शेतकऱ्यांची फसवणूक होऊ नये म्हणून कृषी विभागाच्या वतीने पथके तयार करण्यात आली आहेत. दरम्यान, उदगीरनजीकच्या निडेबन येथील कृष्णनगरात अनधिकृत खताचा साठा व विक्री होत असल्याची माहिती कृषी विभागास मिळाली. त्यावरून जिल्हा परिषदेचे कृषी विकास अधिकारी दीपक सुपेकर, मोहीम अधिकारी मिलिंद बिडबाग, उदगीरचे उपविभागीय कृषी अधिकारी श्रेयस यादव, उदगीर पंचायत समितीचे कृषी अधिकारी बालाजी केदासे, तालुका कृषी अधिकारी संजय नाबदे, कृषी अधिकारी यशपाल सातपुते, गंगाराजू ऐनलवार, भांगे यांनी बुधवारी सकाळी सदर ठिकाणी धाड टाकली.

तेव्हा ज्ञानेश्वर दिगांबर कोहिले (रा. आंदेगाव, ता. मुखेड, जि. नांदेड) हा तिथे होता. त्याच्याकडे कृषी विभागाच्या अधिकाऱ्यांनी चौकशी केली असता उज्जैन येथील कंपनीत तयार झालेल्या विविध प्रकारच्या खताची विक्री करीत असल्याचे सांगितले. तेव्हा कृषी अधिकाऱ्यांनी कंपनीचा खत निर्मिती परवाना, खत साठवणूक, विक्री परवान्याची चौकशी केली असता त्याच्याकडे काहीही आढळून आले नाही. त्यामुळे अधिकाऱ्यांनी गोदामाची झडती घेऊन पाच लाख ६२ हजार ६५० रुपयांचा मुद्देमाल जप्त केला. तसेच खताचे नमुने तपासणीसाठी घेतले. याप्रकरणी कृषी विकास अधिकारी बालाजी केदासे यांच्या फिर्यादीवरून उदगीर ग्रामीण पोलिस ठाण्यात ज्ञानेश्वर कोहिले याच्याविरुद्ध गुन्हा दाखल करण्यात आला आहे.