‘युपीएससी’मध्ये हर्षवर्धन तिडकेची बाजी; स्वयंअध्ययनातून पेलले यशाचे शिवधनुष्य !

देशात ३५५ वी रँक : दुसऱ्या प्रयत्नामध्ये यश

राजकुमार जोंधळे 

लातूर : केंद्रीय लोकसेवा आयोगाने घेतलेल्या परीक्षेचा निकाल शुक्रवारी जाहीर झाला. यामध्ये पांगरी (ता. परळी वैजनाथ, जि. बीड) येथील मूळचा रहिवासी व लातुरात वास्तव्याला असलेल्या हर्षवर्धन अशोकराव तिडके याने देशात ३५५ वी रँक मिळविली. कुठलीही खासगी शिकवणी न लावता हर्षवर्धनने स्वयंअध्ययनातून युपीएससीचे हे शिवधनुष्य पेलले आहे.

अंबाजोगाई येथील न्यू व्हिजन पब्लिक स्कूलमध्ये हर्षवर्धनचे प्राथमिक शिक्षण झाले. त्यानंतर ६ वी ते १२ वीपर्यंतचे शिक्षण संत तुकाराम नॅशनल मॉडेल स्कूलमध्ये झाले. त्यानंतर आयआयटी बॉम्बे पवई येथे बीटेकचे शिक्षण झाले. त्यानंतर हर्षवर्धनने युपीएससीची तयारी सुरू केली. त्यानंतर पहिल्या प्रयत्नात हर्षवर्धनच्या पदरी अपयश आले. मात्र त्याने खचून न जाता पुन्हा जिद्दीने, अभ्यासात सातत्य ठेवले. दररोज किमान आठ ते दहा तास अभ्यास केला. स्वयंअध्ययन करीत त्याने यशाचा झेंडा रोवला आहे. आई गृहिणी, तर वडील लातुरात कृषी अधिकारी म्हणून कार्यरत आहेत. आई-वडिलांनी दिलेले पाठबळ आणि प्रोत्साहनाच्या बळावर हर्षवर्धनने हे नेत्रदीपक यश खेचून आणले आहे. चिकाटी अन्‌ जिद्दीचे फलित आहे.

रोज सकाळी २ तास वर्तमानपत्राचे वाचन...हर्षवर्धनचे वडील अशोकराव तिडके म्हणाले, रोज सकाळी उठल्यानंतर तो दोन तास चार ते पाच वर्तमानपत्रांचे वाचन करीत होता. त्यानंतर जवळपास आठ तास अभ्यास करायचा. पहिल्या प्रयत्नात यशाने हुलकावणी दिली. मात्र दुसऱ्या प्रयत्नात त्याने देशात ३५५ वी रँक मिळविली, हे यश विद्यार्थी आणि स्पर्धा परीक्षेची तयारी करणाऱ्यांसाठी प्रेरणरादायी आहे.