रोटरीच्या वतीने गौरी-गणपती सजावट स्पर्धा

उदगीर : येथील रोटरी क्लब ऑफ उदगीर सेंट्रलच्या वतीने घरगुती गौरी-गणपती सजावट स्पर्धेचे आयोजन करण्यात आले आहे.

या स्पर्धेचे महिला सशक्तिकरण, पर्यावरण व लढा कोरोनाशी आदी विषय ठेवण्यात आले आहेत. या विषयाला अनुसरून स्पर्धकांनी आपल्या गौरी- गणपतीच्या समोर केलेल्या देखाव्याचा तीन मिनिटांचा व्हिडीओ रोटरी क्लबकडे सादर करावा. या स्पर्धेत सहभागी होणाऱ्या स्पर्धकांनी आपले व्हिडीओ प्रोजेक्ट चेअरमन डॉ.सुनिता लोहारे व महानंदा सोनटक्के यांच्याकडे पाठवावेत, असे आवाहन रोटरीचे अध्यक्ष प्रमोद शेटकार व सचिव रवींद्र हसरगुंडे यांनी केले आहे. या स्पर्धेतील प्रथम, द्वितीय, तृतीय व उत्तेजनार्थ विजेत्यांना अनुक्रमे १,००१ रु., ५०१ रु. व २५१ रु. रोख रक्कम, स्मृतिचिन्ह व प्रमाणपत्र, तसेच सहभागी स्पर्धकांना सहभाग प्रमाणपत्र देण्यात येणार आहे.

श्री हावगीस्वामी महाविद्यालयात शिक्षक दिन.

उदगीर : येथील श्री हावगीस्वामी महाविद्यालयात डॉ.सर्वपल्ली राधाकृष्ण यांचा जन्म दिन शिक्षक दिन म्हणून मोठ्या उत्साहात व आनंदात साजरा करण्यात आला. प्रारंभी प्रा.प्राचार्य डॉ.संजय शिंदे यांनी राधाकृष्णन यांच्या प्रतिमेस पुष्पहार अर्पण करून अभिवादन केले. यावेळी प्रा.डॉ.दत्ताहरी होनराव, उपप्राचार्य प्रा.डॉ.आप्पाराव काळगापुरे, कार्यालयीन अधीक्षक सूर्यकांत धनुरे, ग्रंथपाल प्रा.अजित रंगदळ, कनिष्ठ महाविद्यालयाचे पर्यवेक्षक प्रा.दिलीपकुमार मुंदडा, महाविद्यालयातील शिक्षक शिक्षकेतर कर्मचारी मोठ्या संख्येने उपस्थित होते. सूत्रसंचालन प्रा.मनोहर भालके यांनी तर आभार प्रा.सुरेश हुसे यांनी मानले.

डी.टी. गाथाडे यांचे निधन

शिरूर अनंतपाळ : तालुक्यातील हिप्पळगाव येथील दगडू तुकाराम उर्फ डी.टी.गाथाडे (५८) यांचे रविवारी अल्पशा आजाराने निधन झाले. त्यांच्या पार्थिवावर अंत्यसंस्कार करण्यात आले. त्यांच्यापश्चात पत्नी, दोन मुले, एक मुलगी, सून, नातवंडे असा परिवार आहे.

जिल्हाध्यक्षपदी कीर्तीरतन सोनाळे यांची निवड

भालकी : वंचित बहुजन आघाडीच्या जिल्हाध्यक्षपदी भालकी येथील कीर्ती रतन सोनाळे यांची तर सचिवपदी रवींद्र देवगफडे, कोषाध्यक्षपदी राजू शिंदे यांची निवड करण्यात आली. कर्नाटक प्रभारी नागेश माने यांच्या नेतृत्वात निवडी करण्यात आल्या. यावेळी कालिदास सूर्यवंशी, राहुल शिंदे, अशोक साने, संतोश गायकवाड, नागनाथ बिरादार, रफिक गोरवाले, प्रदीप भाविकट्टी, किरण कांबळे, मिलिंद मुळे, अशोक शिंदे, भरत लंजवाडे, दत्ता बुडक्के, विनोद लाखणगाव, विजित कांबळे, उदय वाघमारे उपस्थित होते.