त्या मृत्यूप्रकरणी खुनाचा गुन्हा दाखल

पोलिसांनी सांगितले, निलंगा तालुक्यातील मदनसुरी मोडच्या पश्चिमेस रस्त्यालगत अनोळखी व्यक्ती मृत अवस्थेत आढळल्याची माहिती पोलीस पाटीलांनी बुधवारी कासारशिरसी पोलीस ठाण्यात दिली. त्यानंतर सपोनि. रेवनाथ डमाळे व सहायक पोलीस उपनिरीक्षक प्रताप गर्जे यांनी घटनास्थळी धाव घेऊन पंचनामा केला. व्यक्तीची ओळख पटविण्यासाठी पोलीस भीमाशंकर भोसले व मन्मथ धुमाळ यांनी सदरील मयताचे फोटो काढून सोशल मीडियावर टाकले.

या घटनेची माहिती उपविभागीय पोलिस अधिकारी दिनेशकुमार कोल्हे व पोलीस अधीक्षक निखील पिंगळे यांना देण्यात आली. या अधिकार्‍यांनी भेट देऊन पाहणी केली करुन सूचना केल्या. दरम्यान, पोलीस भोसले यांना मयत व्यक्ती ही उमरगा तालुक्यातील बोरी मातोळा येथील असल्याची माहिती मिळाली आणि त्यांचे नातेवाईक कासारशिरसीला येत असल्याचे समजले. सदरील मयत व्यक्ती ही खंडू मदने असल्याचे निष्पन्न झाले. त्यांचे शवविच्छेदन करून नातेवाईकांच्या ताब्यात मृतदेह देण्यात आला.

याप्रकरणी मयताचा भाऊ पंडित मदने यांच्या फिर्यादीवर अज्ञात आरोपीविरोधात खुनाचा गुन्हा दाखल करण्यात आला आहे. पुढील तपास पोलीस उपनिरीक्षक प्रताप गर्जे करीत आहेत.