कोरोना काळात दहा हजार रुग्णांचे सिटी स्कॅन

लातूर : विलासराव देशमुख शासकीय वैद्यकीय विज्ञान संस्थेत गेल्या वर्षभरातील कोरोना काळात १० हजार ३६२ रुग्णांचे सिटी स्कॅन करण्यात आले असून, ४५ हजार ७९४ रुग्णांची एक्सरे तपासणी करण्यात आली आहे. एक्सरे व सिटी स्कॅनच्या तपासणीचा हा उच्चांक असून, सर्वसामान्य तसेच गरजू रुग्णांना या तपासणीचा फायदा झाला आहे. विलासराव देशमुख शासकीय वैद्यकीय विज्ञान संस्थेचा क्ष-किरण विभाग २४ तास कार्यरत आहे. गरजूंना माफक दरामध्ये सिटी स्कॅन व एक्सरे तपासणी उपलब्ध करून देण्यात आली आहे. कोविड रुग्णांसाठी तपासणीच्या दिवशीच अंतिम अहवाल रुग्णांना देण्यात येतो. तसेच सिटी स्कॅन तपासणीमध्ये किती स्टोअर आहे यावरून संसर्गाची लागण किती प्रमाणात झाली याची माहिती त्वरित मिळू शकते. सदर सेवा संस्थेमध्ये उपलब्ध असल्याने रुग्णांना आवश्यक व वेळेत उपचार मिळण्यास मदत होत आहे. ऑगस्ट महिन्यामध्ये सर्वाधिक ६ हजार ४५३ रुग्णांचा एक्सरे, एप्रिल २०२१ मध्ये २ हजार १०३ रुग्णांचे सिटी स्कॅन करण्यात आले. तपासणी दरम्यान कोरोना संसर्गाची लागण होऊ नये म्हणून क्ष-किरणशास्त्र विभागामार्फत योग्य ती खबरदारी घेण्यात येत आहे.

एक्सरे तपासणीची स्वतंत्र व्यवस्था

विलासराव देशमुख शासकीय वैद्यकीय विज्ञान संस्थेत एक्सरे तपासणीची स्वतंत्र व्यवस्था करण्यात आली आहे. अतिदक्षता विभागातील ज्या रुग्णांना व्हेंटिलेटर व ऑक्सिजनची आवश्यकता आहे, तसेच ज्या रुग्णांचे सिटी स्कॅन करणे शक्य नाही, अशा रुग्णांची जागेवरच (पोर्टेबल एक्सरे) करण्याची सुविधा उपलब्ध करून देण्यात आली आहे, अशी माहिती अधिष्ठाता डॉ. सुधीर देशमुख यांनी दिली. गरजूंनी या सुविधांचा लाभ घ्यावा, असे आवाहन अधिष्ठाता डॉ. देशमुख यांच्यासह क्ष-किरण शास्त्र विभाग प्रमुख डॉ. बालाजी कोंबडे, उपअधिष्ठाता डॉ. शैलेंद्र चव्हाण, औषध वैद्यकशास्त्र विभाग प्रमुख डॉ. नीलिमा देशपांडे, वैद्यकीय अधीक्षक डॉ. संतोषकुमार डोपे, अतिरिक्त वैद्यकीय अधीक्षक डॉ. महादेव बनसोडे यांनी केले आहे.

महिनानिहाय एक्सरे व सिटीस्कॅन

महिना एक्सरे सिटीस्कॅन

जून २०२० ३४६४ ५५३

जुलै ४९९८ ४३४

ऑगस्ट ६४५३ ४८१

सप्टेंबर ४२२८ ६९५

ऑक्टोबर ३८५५ ७२५

नोव्हेंबर ३३६४ ८१९

डिसेंबर ३९८६ ८१४

जानेवारी २०२१ ३९०२ ८२५

फेब्रवारी ३४३७ ७२६

मार्च ४६३२ ७०९

एप्रिल २३८४ २१०३

मे २०८१ १४७८

एकूण ४५७९४ १०३६२