३४७५ शिक्षकांनी घेतली नाही लस; मुलांना शाळेत पाठवायचे कसे?

लातूर : कोरोनाच्या पार्श्वभूमीवर राज्य शासनाच्या वतीने शिक्षक, शिक्षकेत्तर कर्मचाऱ्यांचे लसीकरण करण्याच्या सूचना केल्या आहेत. जिल्ह्यात आतापर्यंत जि.प.आणि खासगी शाळा मिळून ११ हजार ७९० शिक्षकांचे लसीकरण झाले आहे. तर जिल्हा परिषदेच्या ४०९ आणि खासगी शाळांच्या ३ हजार ६६ शिक्षकांनी अद्यापही लसीचा एकही डोस घेतलेला नाही. त्यामुळे मुलांना शाळेत पाठवायचे कसे असा सवाल पालकांमधून उपस्थित केला जात आहे.

जिल्ह्यात जि.प.च्या १२६९ शाळा असून, त्यामध्ये ५ हजार २७८ तर खासगीच्या १ हजार २५८ शाळा असून, यामध्ये १२ हजार ५१४ शिक्षक कार्यरत आहेत. यापैकी जि.प.च्या ४ हजार ४६३ तर खासगीच्या ७ हजार ३२६ शिक्षकांनी लसीचे दोन्ही डोस घेतले आहेत. दरम्यान, ज्यांचे लसीकरण बाकी आहे त्यांनी लवकरात लवकर लसीकरण करुन घेण्याच्या सूचना शिक्षण विभागाच्या वतीने देण्यात आल्या आहेत.

लस घेण्याच्या सूचना...

जिल्ह्यातील सर्वच माध्यमांच्या शिक्षकांना लसीकरण पूर्ण करण्याच्या सूचना आहेत. बहुतांश जणांचे लसीकरण झाले आहे. ज्यांचे लसीकरण बाकी आहे त्यांनी लवकरात लवकर लस घेऊन सहकार्य करावे. शाळांना याबाबत सूचना करण्यात आल्या आहेत.

- भगवान फुलारी, शिक्षणाधिकारी