Latest Marathi News | Breaking News in Marathi | Live News in Marathi | Marathi News Headlines | लोकमत ताज्या बातम्या | मराठी बातम्या | ताज्या मराठी बातम्या लाईव्ह | मराठी लेटेस्ट न्यूज

Chandrapur Toll Plaza Accident: चंद्रपुरात एका टोल नाक्यावर टेम्पो चालकाने तिथल्या कर्मचाऱ्याला चिरडल्याची धक्कादायक घटना समोर आली आहे. चंद्रपूर जिल्ह्यातील विसापूर टोल नाक्यावर एका टोल बूथ कर्मचाऱ्याने वाहन चालकाला टोल शुल्क भरण्यास सांगितल्यानंतर चालकाने त्याला चिरडले. या घटनेत टोल कर्मचारी गंभीर जखमी झाला असून त्याच्यावर रुग्णालयात उपचार सुरु आहेत. महत्त्वाची बाब म्हणजे हा सगळा प्रकार टोल नाक्यावर लावण्यात आलेल्या सीसीटीव्हीमध्ये कैद झाला. फुटेजमध्ये वाहन चालक कर्मचाऱ्याच्या अंगावरुन गाडी नेत असल्याचे दिसत आहे.शुक्रवारी मध्यरात्री १ वाजण्याच्या सुमारास ही घटना घडली. बल्लारशाहहून चंद्रपूरकडे जाणाऱ्या टाटा एस वाहनाने पैसे न भरता लेन ओलांडून टोल ओलांडण्याचा प्रयत्न केला. टोल कर्मचाऱ्याने गाडी थांबवण्याचा प्रयत्न केला तेव्हा चालकाने गाडी थांबवण्याऐवजी त्याला धडक दिली. या धडकेत कर्मचारी गंभीर जखमी झाला. २७ वर्षीय संजय अरुण वांधरे असे या पीडित कर्मचाऱ्याचे नाव आहे. तो विसापूर टोल नाक्यावर कॉम्प्युटर ऑपरेटर म्हणून काम करत होता. त्याला तातडीने शहरातील एका खाजगी रुग्णालयात नेण्यात आले, जिथे त्याला आयसीयूमध्ये दाखल करण्यात आलं.या घटनेनंतर बल्लारपूर पोलीस ठाण्यात तक्रार दाखल करण्यात आली आहे. टोल बूथ मॅनेजर दिलीप कंचरलावार यांनी पोलिसांकडे तक्रार दिल्यानंतर वाहन चालकाविरुद्ध गुन्हा नोंदवण्यात आला आहे. हत्येच्या प्रयत्नाची तक्रार दाखल करण्यात आली आहे. जखमी कर्मचाऱ्याला चांगल्या उपचारांसाठी नागपूरला पाठवण्यात येत असल्याचे दिलीप कंचरलावर यांनी म्हटलं.चंद्रपूर जिल्ह्यातील बल्लारपूर येथील विसापूर टोल नाक्यावर टाटा एसचा चालक टोल टाळण्यासाठी लाईन ओलांडत होता. यादरम्यान, तिथे उपस्थित असलेल्या कर्मचाऱ्याने त्याला थांबवण्याचा प्रयत्न केला असता त्याने त्याच्या अंगावर गाडी घातली. त्यामुळे कर्मचारी गंभीर जखमी झाला. या प्रकरणाचा तपास सुरू आहे. आरोपीची ओळख पटविण्यासाठी सीसीटीव्हीचा वापर केला जात आहे. लवकरच आरोपीला अटक केली जाईल, अशी माहिती चंद्रपूर पोलिसांनी दिली.