सीए कामकाजाबाबत कोल्हापुरातच दुजाभाव का ?

कोल्हापूर : राज्यातील इतर जिल्ह्यात संचारबंदी असूनही चार्टड अकौंटंटना जीएसटीसह आयकर परतावा, लेखापरीक्षण, हिशेब तपासणी कागदपत्रांच्या पूर्ततेसाठी कामकाज करण्यास मुभा दिली आहे. मात्र, कोल्हापुरात जिल्हा प्रशासनाने या व्यावसायिकांची कार्यालये बंद करण्यास सांगितले आहे. त्यामुळे व्यापाऱ्यांसह ‘सीए’ची पंचाईत झाली आहे.

राज्यासह देशभरातील व्यापाऱ्यांकरिता जीएसटी विवरण पत्रे भरण्याची अंतिम मुदत असूनही राज्य व केंद्र शासनाने जीएसटी परतावा व कर भरण्यास कोणतीही मुदतवाढ दिलेली नाही. त्या उलट कर अधिकाऱ्यांना कोरानाच्या कारणामुळे कार्यालयीन अंतर्गत बाबीकरिता मुदतवाढ दिली आहे. राज्याच्या इतर भागात स्थानिक जिल्हा प्रशासनाने चार्टड अकौंटंटना कार्यालयातून काम करण्यास मुभा दिली आहे. मात्र, कोल्हापुरातील जिल्हा प्रशासनाने असे काम करण्यास चार्टर्ड अकौंटंटना परवानगी नाकारली आहे. जीएसटी अथवा आयकर परतावा व कर भरण्यासाठी कागदपत्रांची पूर्तता न झाल्याने व्यापारीही मोठ्या अडचणीत आले आहेत. व्यापाऱ्यांकडे दैनंदिन व्यापार नसल्याने आर्थिक, तर कर, परतावा वेळेत न भरल्याने दंडात्मक कारवाईला सामोरे जावे लागणार आहे. या सर्व प्रकारामुळे व्यापारी व चार्टर्ड अकौंटंट यांची मोठी पंचाईत झाली आहे. कोल्हापुरात आजमितीला २५० हून अधिक चार्टर्ड अकौंटंट कार्यरत आहेत.

कोट

जीएसटी रिटर्न देय असताना व्यापाऱ्यांना दंड भरावा लागणार आहे. त्याकरिता मुदतवाढ दिलेली नाही. त्याच्या उलट कोरोनाचे कारण देऊन नोटीस काढणे, आदी कामांकरिता कर अधिकाऱ्यांना मुदतवाढ दिली आहे. इतर जिल्ह्यात सीएची कार्यालये सुरू आहेत. मात्र, आपल्याकडेच बंद आहेत. असा दुजाभाव का ?

-सीए दीपेश गुंदेशा