दसरा चौकाजवळून गावठी पिस्तूल जप्त, एकास अटक

कोल्हापूर : स्थानिक गुन्हे अन्वेषण शाखेच्या पथकाने गुरुवारी दसरा चौकातील के.एम.टी. बसस्टाॅपजवळ बेकायदेशीर गावठी पिस्तूल कब्जात बाळगून त्याची विक्री करण्यासाठी आलेल्या तरुणास सापळा रचून अटक केली. अक्षय अमर पाटील (वय २३, रा. डाकवे गल्ली, गौंडचाळ, कॅसेट ग्रुपजवळ, मंगळवारपेठ) असे अटक केलेल्या संशयिताचे नाव आहे. त्याच्याकडून गावठी पिस्तूलसह एक जिवंत राऊंडही जप्त करण्यात आला.

पोलिसांकडून मिळालेली माहिती अशी की, पोलीस अधीक्षक शैलेश बलकवडे यांनी येणारा दसरा सण शांततेत पार पाडण्यासाठी जिल्ह्यात बेकायदेशीर हत्यार बाळगणाऱ्या संशयितांना शोधून त्यांच्याकडील हत्यारे व दारूगोळा जप्त करण्याचे आदेश दिले आहेत. त्यानुसार स्थानिक गुन्हे अन्वेषणचे पोलीस निरीक्षक प्रमोद जाधव यांनी पथके तयार केली आहेत. स्वत: जाधव यांना गुप्त खबऱ्यामार्फत गुरुवारी एक तरुण दसरा चौकात गावठी पिस्तूल विक्रीसाठी येणार असल्याची माहिती मिळाली. त्यानुसार दसरा चौकातील के.एम.टी. बसस्टाॅपजवळ सापळा रचण्यात आला. त्यात अलगदपणे संशयित अक्षय पाटील हा सापडला. त्याच्याकडून ५० हजार किमतीचे गावठी बनावटीचे पिस्तूल व एक जिवंत राऊंड किंमत २०० रुपये असा एकूण ५० हजार २०० रुपयांचा मुद्देमाल मिळून आला. त्याला मुद्देमालासह लक्ष्मीपुरी पोलीस ठाण्यात हजर करण्यात आले. शुक्रवारी संशयितास न्यायालयात हजर केले असता सोमवार (दि. २७)पर्यंत पोलीस कोठडी सुनावण्यात आली. ही कारवाई स्थानिक गुन्हे अन्वेषणचे पोलीस उपनिरीक्षक किशोर डोंगरे, अंमलदार शिवाजी जामदार, नितीन चौथे, गुलाब चौगुले, अजय काळे, सुनील कवळेकर, महेश गवळी, रवींद्र कांबळे, औंकार परब, संजय पडवळ, अनिल जाधव, रफीक आवळकर, राजेंद्र वरंडेकर, महिला पोलीस अंमलदार नीलम कांबळे यांनी केली.

फोटो : २४०९२०२१-कोल-एलसीबी

ओळी : स्थानिक गुन्हे अन्वेषण शाखेच्या पथकाने बेकायदेशीर गावठी पिस्तूल विक्रीसाठी दसरा चौकात आलेल्या अक्षय मोरे यास पिस्तुलासह अटक केली.