कोल्हापूर : मिरज- पंढरपूर रोडवर तासगाव फाट्यानजीक रस्त्यावर थांबलेल्या ट्रकला पाठीमागून दुचाकीची धडक बसल्याने दिंडनेर्ली (ता. करवीर) येथील भैरीनाथ बाबुराव मेटील ( वय 37 ) व मोहन हिंदुराव बोटे (वय 40) या दोन तरुणांचा जागीच मृत्यू झाला. पंढरपूरला जात असताना मंगळवारी रात्री बारा वाजण्याच्या सुमारास हा अपघात घडला.
एकादशी असल्याने मोहन बोटे व भैरीनाथ मेटील हे दोघे तरुण भैरीनाथ यांची दुचाकीवरून सायंकाळी सातच्या दरम्यान गावातून पंढरपूरकडे निघाले होते. यावेळी मिरज-पंढरपूर रस्त्यावर तासगाव फाट्यानजीक रात्री बाराच्या दरम्यान रस्त्यावर लावलेल्या ट्रकला पाठीमागून जोराची धडक बसली. दोघांच्याही डोक्याला जबर मार बसल्याने त्यांचा जागीच मृत्यू झाला. दोघेही सामान्य कुटुंबातील असल्याने व एकाच गल्लीतील असल्याने गावावर शोककळा पसरली आहे.
भैरवनाथ गवंडी काम करत होता. तर मोहन हा शाहू साखर कारखान्याचा कर्मचारी होता. भैरवनाथ यांच्या पश्चात पत्नी, आई, दोन मुली, एक मुलगा असा परिवार असून मोहन याच्या मागे आई, वडील ,पत्नी ,एक मुलगा, एक मुलगी असा परिवार आहे.