कोल्हापूर : कोल्हापूरमध्ये रिक्षा चोरण्याचा डाव फसल्याने चोरट्यांनी रिक्षाचे टायर चोरल्याची घटना समोर आली आहे. शहरातील रेल्वे फाटक ते टेम्बलाई रोडजवळ प्रशांत सुरेश कांबळे यांनी आपल्या मालकीची रिक्षा नेहमीप्रमाणे त्यांच्या घरासमोर लावली होती. रात्रीच्या सुमारास अज्ञात चोरट्यांनी संधी साधून रिक्षाचे हँडल लॉक रिक्षा चोरण्याचा प्रयत्न केला. मात्र त्यांचा हा प्रयत्न अयशस्वी झाला. त्यामुळे चोरटयांनी रिक्षाची तीन चाके, सर्व सीट्स चोरून, सर्व वायरींग तोडून पळ काढल्याची घटना घडली आहे.
रिक्षा मालक प्रशांत कांबळे (40) यांनी चोरीचा हा प्रकार लक्षात येताच शाहूपुरी पोलीस ठाण्यात याबाबत तक्रार दाखल केली आहे. पोलिसांनी तक्रारीनुसार अज्ञात चोरट्यांविरोधात गुन्हा दाखल करत पुढील तपास सुरू केला आहे. कांबळे यांचे सुमारे 15 हजार रुपयांचे नुकसान झाले आहे. या परिसरात आतापर्यंत अनेकदा चैन, मंगळसूत्र हिसकवण्याचे प्रकार घडले आहेत. अनेक ठिकाणी सीसीटीव्ही कॅमेरे असूनही देखील बिनधास्तपणे चोरीच्या घटना घडत आहेत. यामुळे परिसरातील नागरिक धास्तावले आहेत.