Kolhapur: मनीष नागोरीला पिस्तुले पुरवणाऱ्या तस्कराला मध्यप्रदेशात ठोकल्या बेड्या, एलसीबीच्या पथकाने १० दिवस तळ ठोकून केली कारवाई

चार पिस्तुले जप्त 

कोल्हापूर : कुख्यात शस्त्रतस्कर मनीष रामविलास नागोरी (वय ३६, रा. यड्राव, ता. शिरोळ) याला पिस्तुलांचा पुरवठा करणाऱ्या मध्यप्रदेशातील तस्कराला स्थानिक गुन्हे अन्वेषण शाखेच्या पथकाने मध्यप्रदेशात जाऊन बेड्या ठोकल्या. सरनाम नाहरसिंह बरनाला (२८, रा. सिंगनूर, ता. गोगाव, जि. खरगुण, राज्य मध्यप्रदेश) असे अटकेतील सराईत तस्कराचे नाव आहे. पोलिसांनी त्याच्याकडून दोन लाख रुपये किमतीची चार पिस्तुले आणि चार जिवंत काडतुसे जप्त केली. या कारवाईतून कोल्हापुरातील शस्त्रतस्करीचे मध्यप्रदेश कनेक्शन उघडकीस आले आहे.पिस्तूल आणि अमली पदार्थ तस्करीच्या गुन्ह्यात १५ दिवसांपूर्वी शहापूर पोलिसांनी कुख्यात शस्त्रतस्कर मनीष नागोरी याला अटक केली होती. गुन्ह्याची व्याप्ती लक्षात घेऊन पोलिस अधीक्षक योगेश कुमार यांनी याचा तपास स्थानिक गुन्हे अन्वेषण शाखेकडे सोपवला. नागोरीची चौकशी करून सहायक पोलिस निरीक्षक सागर वाघ यांचे पथक शस्त्रतस्करीचा उलगडा करण्यासाठी मध्यप्रदेशातील खरगुण जिल्ह्यात गेले होते. तिथे बुऱ्हाणपूर परिसरात तळ ठोकून या पथकाने शस्त्रपुरवठादार सरनाम बरनाला याचा माग काढला. रविवारी (दि. १५) एका हॉटेलजवळ शस्त्रविक्रीसाठी आलेल्या सरनामला पकडण्याचा प्रयत्न केला. मात्र, चार पिस्तुलांची पिशवी टाकून त्याने धूम ठोकली होती.स्थानिक पोलिसांच्या मदतीने वाघ यांच्या पथकाने शुक्रवारी (दि. २०) मध्यप्रदेशातील बिस्टान पोलिस ठाण्याच्या हद्दीत शस्त्रतस्कर सरनामला अटक केली. अधिक चौकशीत त्याने मनीष नागोरी याला शस्त्रांचा पुरवठा केल्याची कबुली दिली. कोल्हापुरात आणून न्यायालयात हजर केले असता, त्याला मंगळवारपर्यंत (दि. २४) पोलिस कोठडी मिळाली. आजवर त्याने किती शस्त्रे कोल्हापुरात विकली, याचा तपास सुरू असल्याचे पोलिसांनी सांगितले.दहा दिवस आरोपीच्या मागावरनागोरी याच्या चौकशीतून मध्यप्रदेशातील तस्कराचे नाव समोर येताच सहायक पोलिस निरीक्षक सागर वाघ, उपनिरीक्षक शेष मोरे, अंमलदार राम कोळी, सुरेश पाटील, रूपेश माने, वैभव पाटील, प्रदीप पाटील, आदींचे पथक मध्यप्रदेशात गेले होते. बुऱ्हाणपूर, खरगुण परिसरात तस्कर बरनाला याचा शोध सुरू होता. एका कारवाईत हुलकावणी देऊन तो पळून गेल्याने पोलिसांची चिंता वाढली होती. अखेर १० दिवसांच्या प्रयत्नांनंतर तो पोलिसांच्या हाती लागला.रॅकेटचा पर्दाफाशशस्त्रतस्करीत अनेकदा मध्यप्रदेश कनेक्शन समोर आले होते. मात्र, त्याच्या मुळाशी पोहोचण्याचे काम झाले नव्हते. गेल्या वर्षी पुण्यातील टोळीयुद्धातून झालेल्या गुन्ह्यानंतर पुणे पोलिसांनी मध्यप्रदेशात जाऊन कारवाया केल्या होत्या. त्यानंतर कोल्हापूर पोलिसांनी केलेली कारवाई महत्त्वाची ठरली. या कारवाईमुळे शस्त्रतस्करीच्या रॅकेटचा पर्दाफाश झाला आहे.