पन्हाळा : भिरभिरणारे भगवे ध्वज, ओसंडून वाहणारा उत्साह, मनामनांत शिवप्रेम, अशा जल्लोषी वातावरणात शिवजयंती उत्सव पन्हाळगडावर अत्यंत साधेपणाने साजरा करण्यात आला. ‘ शिवाजी महाराज की जय’, ‘जय भवानी, जय शिवाजी’चा गजर आणि पन्हाळा शहर परिसरात वातावरण शिवमय झाले होते.
पन्हाळगडावर शिवज्योत नेण्यासाठी महाराष्ट्राच्या कानाकोपऱ्यातून हजारो शिवभक्त पन्हाळ्यावर दाखल झाले. शिवमंदिरातून १,१५० शिवज्योतींचे प्रज्वलन करण्यात आल्याची माहिती मंदिर व्यवस्थापक हनीफ नगारजी यांनी दिली. सकाळी १० वाजता शिवजन्म सोहळा साजरा करण्यात आला. यात महिलांचा मोठा सहभाग होता.
कोरोना संसर्गाच्या पार्श्वभूमीवर नगराध्यक्ष रूपाली धडेल यांनी शिवजयंतीसाठी मोठ्या प्रमाणात गर्दी करू नये, असे आवाहन केले होते. रात्री १.३० वाजेच्या सुमारास पन्हाळगडावर शिवज्योती नेण्यासाठी प्रचंड गर्दी झाली होती. कोरोना पार्श्वभूमीवर आरोग्य विभागाचे कोणीही हजर नव्हते. दरम्यान, शिवज्योती नेण्यास येणाऱ्यांचे वाहनतळ बुधवार पेठ येथे केले होते. पन्हाळा पोलीस प्रशासनाकडून चोख बंदोबस्त ठेवण्यात आला होता, तसेच पालिका कर्मचाऱ्यांकडून उत्कृष्ट नियोजन करण्यात आले होते. पन्हाळगडावरील व्यावसायिकांनी छोटे-मोठे स्टॉल उभारणी केल्यानंतर शहरात यात्रेचे चित्र पाहावयास मिळत होते. संयुक्त शिवजयंती उत्सव समिती पन्हाळा यांच्यामार्फत स्मरणशक्ती स्पर्धा, चित्रकला स्पर्धा, निबंध स्पर्धा, स्लो सायकलिंग स्पर्धा व रक्तदान शिबिर घेण्यात आले. यावेळी नगराध्यक्षा रूपाली धडेल, उपनगराध्यक्ष शरयू लाड, नगरसेवक, नगरसेविका, तसेच संयुक्त शिवजयंती उत्सव समितीचे कार्यकर्ते मोठ्या प्रमाणात उपस्थित होते.
फोटो------- १९ पन्हाळा शिवजयंतीनिमित्त पाळणागीत गाताना महिला.