एस. टी.साठी विद्यार्थ्यांचा जीव धोक्यात

लोकमत न्यूज नेटवर्क

कोपार्डे : कोपार्डे व कुडित्रे येथे शिक्षणासाठी येणाऱ्या महाविद्यालयीन व शालेय विद्यार्थ्यांना येण्या-जाण्यासाठी एस. टी.च्या फेऱ्या वेळेत नसल्याने जीव धोक्यात घालून एस. टी. बस पकडावी लागत आहे. सकाळी ११ ते दुपारी १ या दरम्यान महाविद्यालय सुटल्यानंतर घरी जाण्यासाठी वेळेत एस. टी. बस नसल्याने विद्यार्थ्यांची गैरसोय होत आहे.

करवीर, पन्हाळा, गगनबावडा व शाहूवाडी या चार तालुक्यांमधील मुले, मुली कोपार्डे येथे असलेल्या स. ब. खाडे महाविद्यालय, औद्योगिक प्रशिक्षण केंद्र व कुंभी कासारी कारखान्यावर असलेल्या श्रीराम हायस्कूल व ज्युनिअर कॉलेज, डी. सी. नरके ज्युनिअर कॉलेज तसेच अनेक संगणक प्रशिक्षण देणाऱ्या क्लासेससाठी मोठ्या संख्येने येत असतात. दररोज एक ते दीड हजार विद्यार्थी येथे शिक्षणासाठी येतात.

ग्रामीण भागातून येणाऱ्या या मुलांना वेळेत महाविद्यालय व शाळेत पोहोचण्यासाठी व सुटल्यानंतर घरी पोहोचण्यासाठी एस. टी.कडून वेळापत्रकाचे नियोजन केलेले नसल्याने गैरसोय होत आहे. मुला-मुलींना सुट्टी झाल्यानंतर कोपार्डे येथील सांगरूळ फाट्यावर बससाठी यावे लागते. एखादी एस. टी. कोल्हापूरहून येताना दिसताच ती पकडण्यासाठी मुली जीव धोक्यात घालून धाव घेतात.

..........

शाळा सुटताना एस. टी.ची फेरी असावी

ग्रामीण भागातून येणारे विद्यार्थी सकाळी पाच वाजल्यापासून शाळेच्या वाटेवर असतात. तसेच सुटल्यानंतर एस. टी. वेळेत मिळाली नाही तर घरी पोहोचण्यासाठी दुपारी दोन ते तीन वाजतात. यासाठी शाळा सुटण्याच्या वेळेत एस. टी. फेऱ्यांचे नियोजन करण्याची मागणी होत आहे.

शिक्षक आमदारांनी लक्ष घालावे

सांगरूळ शिक्षण संस्थेचे सचिव प्रा. जयंत आसगावकर हे शिक्षक आमदार झाले आहेत. त्यांच्या संस्थेत शिक्षणासाठी येणाऱ्यांची संख्या ८० टक्के आहे. त्यामुळे या विद्यार्थ्यांची एस. टी.साठी होणारी परवड थांबविण्यासाठी आसगावकर यांनी यात लक्ष घालावे, अशी मागणी होत आहे.

(फोटो) २२ कोपार्डे

कोपार्डे येथे सांगरूळ फाट्यावर महाविद्यालय व शाळकरी मुलींची एस. टी. पकडण्यासाठी जीवघेणी धडपड सुरू असते.