कोल्हापूर : पदोन्नत्या, कोविड लाभ, रेराअंतर्गत कारवाई, अनुकंपा भरती या प्रमुख मागण्यांसह प्रलंबित प्रश्नांच्या सोडवणुकीसाठी नोंदणी व मुद्रांक विक्रेत्यांनी सुरू केेलेल्या कामबंद आंदोलनाच्या पहिल्याचदिवशी २०० कोटींचा महसूल बुडाला आहे. मुद्रांकशी संबंधित राज्यातील १६०० कर्मचारी यात सहभागी झाले आहेत.
गेल्या तीन-चार वर्षांपासून सातत्याने पाठपुरावा करूनदेखील शासनाकडून मुद्रांकमधील अधिकारी, कर्मचाऱ्यांच्या प्रश्नांकडे शासन दुर्लक्ष करत आहे. मागील पंधरवड्यात कामबंद आंदोलनाचा इशारा देऊनदेखील शासनाने दखल घेतली नाही. त्यामुळे ठरल्याप्रमाणे मंगळवारपासून बेमुदत कामबंद आंदोलनास सुरुवात झाली.
कोरोनाकाळात मृत्यू झालेल्यांना ५० लाखांची भरपाई देण्याचा निर्णय शासनाने घेतला होता, पण त्याची अंमलबजावणी केलेली नाही. त्यामुळे या कोराेना काळात मृत्यू झालेल्या मुद्रांक विक्रेत्यांच्या वारसांना ५० लाखांची भरपाई व अनुकंपा तत्त्वावर भरती करून घ्यावी, अशी प्रमुख मागणी केली आहे. रेराअंतर्गत विक्रेत्यांवर कारवाई झाली आहे, त्या कारवाया मागे घ्याव्यात, अशी एक मागणी आहे. पदोन्नतीच्याबाबतीत सातत्याने टोलवाटोलवी केली जात आहे. नवीन सेवा प्रवेश नियम न लावता पदोन्नतीची मागणी आहे. रिक्त पदेही बऱ्याच वर्षांपासून भरलेली नाहीत.
चौकट
नागरिकांचा खोळंबा
कोरोनाची साथ ओसरल्यानंतर आता बऱ्यापैकी सरकारी कामे सुरू झाली असून, व्यवहारही वाढले आहेत. मुद्रांक नोंदणी व विक्रीसाठी रांगा लागलेल्या आहेत. कोरोना तपासणी नियमही शिथिल केल्याने गर्दीत वाढ झाली आहे. आता कामे युध्दपातळीवर करून घेतली जात असतानाच हे बेमुदत कामबंद आंदोलन सुरू झाल्याने नागरिकांची नोंदणीची सर्व कामे ठप्प झाली आहेत.
प्रतिक्रिया
अजून चर्चेचे निमंत्रण आलेले नाही. बैठकीला बोलावले तर जाऊ, पण सध्या कोणत्याही परिस्थितीत माघार घेणार नाही. शासनाला आम्ही सातत्याने मुदत दिली, पण त्यांनी लक्ष दिले नाही. आम्ही मागण्या मान्य होईपर्यंत आंदोलन सुरूच ठेवणार आहोत.
गजानन खोत, राज्याध्यक्ष, राजपत्रित अधिकारी, कर्मचारी संघटना, मुद्रांक व नोंदणी
फोटो: २१०९२०२१-कोल-स्टाम्प ०१, ०२
फोटो ओळ : मुद्रांक विभागातील अधिकारी व कर्मचाऱ्यांनी मंगळवारपासून बेमुदत कामबंद आंदाेलन सुरू केलेल्या मध्यवर्ती प्रशासकीय इमारतीतील कायम गजबजलेले नोंदणी केंद्र असे ओस पडले होते. दारासमोर लावलेले कामबंद आंदोलनाची नोटीस बघून नागरिक माघारी फिरत होते.
(छाया: नसीर अत्तार)