मुंगसाच्या हल्ल्यातील जखमी नागाला जीवदान

मांडेदुर्ग (ता. चंदगड) येथील बाळू धामणेकर यांच्या काजू बागेत मुंगूस व नाग यांच्यातील झुंजीत नाग जखमी झाला होता. साप घाबरुन काजूच्या झाडावर चढून बसला होता. ही घटना समजताच ढोलगरवाडी सर्पशाळेचे प्रा. सदाशिव पाटील व सहकाऱ्यांनी मुंगसाला हुसकावून लावून जखमी नागास झाडावरून खालील सुरक्षित काढून आणले. त्यानंतर गेले ८ दिवस त्याच्यावर पशुवैद्यकीय अधिकारी डॉ. अरुण मनगुतकर यांच्यामार्फत उपचार करण्यात आले. सोमवारी (दि. १५) सर्पमित्र प्रा. सदाशिव पाटील यांनी पाटणे वनपरिक्षेत्राचे प्र. वनक्षेत्रपाल दत्ता पाटील व स्टाफच्या मदतीने सापाला नैसर्गिक अधिवासात सुखरूप सोडले. यावेळी मुख्याधापक एस. आर. पाटील, तानाजी कांबळे यांचे सहकार्य लाभले. यावेळी वनपाल बी. आर. भांडकोळी, वनपाल एन. एम. धामणकर, वनरक्षक डी. एस. रावळेवाड, वनरक्षक दीपक कदम, विश्वनाथ नार्वेकर उपस्थित होते .

फोटो ओळी:--- पाटणे (ता. चंदगड) येथील जंगलात नागाला सोडताना वनक्षेत्रपाल दत्ता पाटील, सर्पमित्र पाटील, वनपाल भांडकोळी, धामणकर आदी.