नऊ वाजता सुरू होते नोंदणी; दोन मिनिटांत हाऊसफुल्ल!

कोरोना लसीकरणाच्या तिसऱ्या टप्प्यामध्ये १८ ते ४४ वयोगटांतील नागरिकांचे लसीकरण शासनाच्या निर्देशानुसार जिल्हा प्रशासनाने दि. १ मेपासून पुढील सात दिवस प्रायोगिक तत्त्वावर सुरू केले. या वयोगटांतील ११,८५२ नागरिकांचे सोमवार (दि. १०) पर्यंत लसीकरण झाले आहे. या गटांतील नागरिकांनी लस घेण्याच्या किमान एक दिवस आधी कोविन पोर्टल अथवा ॲॅपवर ऑनलाईन नोंदणी करून अपॉयमेंट घेणे बंधनकारक आहे. त्यानुसार या वयोगटांतील नागरिक नोंदणीसह अपॉयमेंट घेण्याचा प्रयत्न करत आहेत. मात्र, कधी सकाळी नऊ वाजता, कधी अकरा, कधी दुपारी एक, तर कधी पावणेचार वाजता या पोर्टलवर अपॉयमेंट घेण्याचा स्लॉट खुला होत आहे. पोर्टलवर नोंदणीकृत मोबाईल क्रमांक, लसीकरणाचे केंद्र टाकून पुढील प्रक्रिया पूर्ण करेपर्यंत अवघ्या दोन ते तीन मिनिटांतच बुक्ड अशा संदेशासह अपॉयमेंट हाऊसफुल्ल झाल्याचे दाखवित आहे. काही नागरिकांनी रात्री अकरा, बारानंतर, तर काहींनी सकाळी सहा, सात वाजता वेगवेगळ्या वेळी ऑनलाईन अपॉयमेंट मिळविण्याचा प्रयत्न केला, तरीही त्यांना ती मिळालेली नाही. त्यामुळे लस घेण्याबाबतच्या अपॉयमेंट मिळविण्यासाठीचा मनस्ताप नागरिकांना होत आहे.

पॉंईटर

१८ ते ४४ वयोगटांतील किती जणांचे झाले लसीकरण : ११८५२

१८ते ४४ वयोगटांतील जिल्ह्यातील एकूण लोकसंख्या : १८,५२,३६८

१८ ते ४४ वयोगटांतील लसीकरण झालेल्यांची टक्केवारी : एक टक्का

चौकट

सकाळी नऊ वाजता रहा तयार

केंद्रनिहाय उपलब्ध डोसची पोर्टलवर नोंदणी झाल्यानंतर अपॉयमेंटचा स्लॉट दिसतो. सर्वसाधारणपणे सकाळी नऊ वाजता स्लॉट खुला होतो. त्यामुळे यावेळेपासून नागरिकांनी लॉगीन व्हावे. मोबाईल क्रमांक नोंदविल्यानंतर शेड्युलमध्ये सेंटर निवडून अपॉयमेंट मिळविण्याची प्रक्रिया पूर्ण करावी.