Kolhapur Crime: फिल्मी स्टाइल दादागिरी अन् पाठलाग करून केला वार, महिलांसह तिघे जखमी

लक्ष्मीपुरी पोलिस आणि नागरिकांनी पाठलाग करून हल्लेखोरास पकडले

कोल्हापूर : लक्ष्मीपुरीतील मटण मार्केट परिसरात कुऱ्हाड फिरवत दहशत माजवणाऱ्या सराईत गुन्हेगाराच्या हल्ल्यात दोन महिलांसह तिघे जखमी झाले. लक्ष्मीपुरी पोलिसांसह नागरिकांनी पाठलाग करून हल्लेखोर आरबाज बागवान (रा. लक्षतीर्थ वसाहत) याला पकडले. हा थरारक प्रकार मंगळवारी (दि. १८) रात्री दहाच्या सुमारास घडला.याबाबत अर्चना सचिन साळी (वय ४०, रा. विक्रमनगर, कोल्हापूर) यांनी लक्ष्मीपुरी पोलिस ठाण्यात फिर्याद दिली. साळी यांच्यासह सचिन बाळासो साळी आणि अश्विनी अजित मोहिते (सर्व रा. विक्रमनगर) हे जखमी झाले.लक्ष्मीपुरी पोलिसांनी दिलेल्या माहितीनुसार, सचिन साळी हे पत्नी आणि नातेवाईक महिलेसह सिनेमा पाहण्यासाठी लक्ष्मीपुरीत आले होते. सिनेमा संपल्यानंतर साडेनऊच्या सुमारास ते मटण मार्केट परिसरातील एका हॉटेलमधून जेवणाचे पार्सल घेण्यासाठी गेले. रस्त्याकडेला कार पार्क करून हॉटेलमध्ये गेले असता, कुऱ्हाड नाचवत दहशत माजवणारा आरबाज बागवान कारचा दरवाजा उघडून कारमध्ये बसला. घाबरलेल्या महिलांनी मोबाइलवरून याची माहिती सचिन साळी यांना दिली. साळी यांनी बागवानला कारमधून ओढून काढले. त्यानंतर बागवान साळी यांना मारण्यासाठी त्यांच्या पाठीमागे लागला. त्याच्या हल्ल्यात कारमधील अर्चना साळी यांच्यासह अश्विनी मोहिते आणि सचिन साळी हे जखमी झाले. लक्ष्मीपुरी पोलिस आणि नागरिकांनी पाठलाग करून हल्लेखोर बागवान याला पकडले. या घटनेने परिसरात भीतीचे वातावरण निर्माण झाले होते.